Қызметтер үшін төлем тек компанияның шотына төленеді. Сізге ыңғайлы болу үшін біз Kaspi RED / CREDIT /БӨЛІП ТӨЛЕУДІ іске қостық 😎

Басты бет / Конвенция / Резолюция / Концепция / ӨНЕРКӘСІПТІК МЕНШІКТІ ҚОРҒАУ ЖӨНІНДЕГІ ПАРИЖ КОНВЕНЦИЯСЫ

ӨНЕРКӘСІПТІК МЕНШІКТІ ҚОРҒАУ ЖӨНІНДЕГІ ПАРИЖ КОНВЕНЦИЯСЫ

АMANAT партиясы және Заң және Құқық адвокаттық кеңсесінің серіктестігі аясында елге тегін заң көмегі көрсетілді

ӨНЕРКӘСІПТІК МЕНШІКТІ ҚОРҒАУ ЖӨНІНДЕГІ ПАРИЖ КОНВЕНЦИЯСЫ

Конвенция, 1883 жылғы 20 наурыз

Редакцияланған күні: 20.03.1883

1883 жылғы 20 наурыздағы Конвенция

Өнеркәсіптік меншікті қорғау жөніндегі Париж конвенциясы

Бейресми

мәтін

ПАРИЖ КОНВЕНЦИЯСЫ

ӨНЕРКӘСІПТІК МЕНШІКТІ ҚОРҒАУ ЖӨНІНДЕ

1883 жылғы 20 наурыздағы,

1900 жылғы 14 желтоқсанда БРЮССЕЛЬДЕ, 1911 жылғы 2 маусымда ВАШИНГТОНДА, 1925 жылғы 6 қарашада ГААГАДА, 1934 жылғы 2 маусымда ЛОНДОНДА, 1958 жылғы 31 қазанда ЛИССАБОНДА және 1967 жылғы 14 шілдеде СТОКГОЛЬМДЕ қайта қаралған және 1979 жылғы 2 қазанда өзгертілген

1-бап

(1) Осы Конвенция қолданылатын елдер өнеркәсіптік меншікті қорғау жөніндегі Одақты құрайды.

(2) Өнеркәсіптік меншікті қорғау объектілеріне өнертабыстарға берілетін патенттер, пайдалы модельдер, өнеркәсіптік үлгілер, тауар белгілері, қызмет көрсету белгілері, фирмалық атаулар және тауар шығарылған жердің көрсеткіштері немесе тауар шығарылған жердің атаулары, сондай-ақ жосықсыз бәсекелестіктің жолын кесу жатады.

(3) Өнеркәсіптік меншік ұғымы барынша кең мағынада түсіндіріледі және тек сөздің тікелей мағынасындағы өнеркәсіп пен сауданы ғана емес, сондай-ақ ауыл шаруашылығы өндірісі мен өндіруші өнеркәсіп салаларын және өнеркәсіптік немесе табиғи шығу тегі бар барлық өнімдерді, мысалы: шарап, астық, темекі жапырағы, жемістер, мал, пайдалы қазбалар, минералды сулар, сыра, гүлдер, ұнды да қамтиды.

(4) Өнертабыстарға берілетін патенттерге Одақ елдерінің заңнамасында танылатын өнеркәсіптік патенттердің әртүрлі түрлері, мысалы: әкелу патенттері, жетілдіруге берілетін патенттер, қосымша патенттер мен куәліктер және т.б. жатады.

2-бап

(1) Өнеркәсіптік меншікті қорғауға қатысты Одақтың әрбір елінің азаматтары Одақтың барлық басқа елдерінде тиісті заңдармен өз азаматтарына қазіргі уақытта берілетін немесе болашақта берілуі мүмкін артықшылықтарды пайдаланады, бұл ретте осы Конвенцияда арнайы көзделген құқықтарға нұқсан келтірілмейді. Осыған сәйкес, олардың құқықтары сол елдің азаматтарының құқықтары сияқты қорғалады және олар өз азаматтарына қойылатын талаптар мен формальдылықтарды сақтаған жағдайда, өз құқықтарына жасалған кез келген қолсұғушылықтан заңды қорғаудың сол құралдарын пайдаланады.

(2) Алайда Одақ елдерінің азаматтарына өнеркәсіптік меншік құқықтарының кез келгенін пайдалану үшін қорғау сұралатын елде тұрғылықты жерінің немесе кәсіпорнының болуына қатысты қандай да бір талап қойылмайды.

(3) Одақтың әрбір елінің сот және әкімшілік рәсімдерге, сот және әкімшілік органдардың құзыретіне, сондай-ақ тұрғылықты жерді таңдауға немесе өкіл тағайындауға қатысты өнеркәсіптік меншік туралы заңдар негізінде сақталуы талап етілетін заңнамалық ережелері сөзсіз сақталады.

3-бап

Одақ елдерінің азаматтарына Одаққа қатыспайтын елдердің азаматтары да теңестіріледі, егер олардың Одақ елдерінің бірінің аумағында тұрғылықты жері немесе нақты әрі шынайы өнеркәсіптік немесе сауда кәсіпорындары болса.

4-бап

A. - (1) Одақ елдерінің бірінде өнертабысқа патент, пайдалы модель, өнеркәсіптік үлгі немесе тауар белгісіне өтінімді тиісті түрде берген кез келген тұлға немесе оның құқықтық мирасқоры төменде көрсетілген мерзімдер ішінде басқа елдерде өтінім беру үшін басымдық құқығын пайдаланады.

(2) Басымдық құқығының туындауына Одақтың әрбір елінің ұлттық заңнамасына немесе Одақ елдері арасында жасалған екіжақты немесе көпжақты келісімдерге сәйкес ұлттық өтінімді тиісінше ресімдеп берудің заңды күші бар кез келген өтінім негіз болып танылады.

(3) Ұлттық өтінімді тиісінше ресімдеп беру деп тиісті елде өтінімнің берілген күнін белгілеу үшін жеткілікті болатын, өтінімнің одан арғы тағдырына қарамастан, кез келген өтінімді беру түсініледі.

B. - Осыған байланысты, Одақтың басқа елдерінің бірінде осы мерзімдер аяқталғанға дейін кейіннен берілген өтінім осы уақыт аралығында жасалған әрекеттер негізінде, атап айтқанда, басқа өтінімнің берілуі, өнертабыстың жариялануы немесе пайдаланылуы, үлгі даналарының сатылымға шығарылуы, белгінің қолданылуы негізінде жарамсыз деп танылмайды және бұл әрекеттер үшінші тұлғалардың қандай да бір құқықтарының немесе қандай да бір жеке иелену құқығының туындауына негіз бола алмайды. Басымдық құқығына негіз болып табылатын бірінші өтінім берілген күнге дейін үшінші тұлғалар иеленген құқықтар Одақтың әрбір елінің ішкі заңнамасына сәйкес сақталады.

C. - (1) Жоғарыда аталған басымдық мерзімдері өнертабыстарға берілетін патенттер мен пайдалы модельдер үшін он екі айды, ал өнеркәсіптік үлгілер мен тауар белгілері үшін алты айды құрайды.

(2) Бұл мерзімдердің өтуі бірінші өтінім берілген күннен басталады; өтінім берілген күн мерзімге есептелмейді.

(3) Егер мерзімнің соңғы күні заң бойынша мереке күні немесе қорғау сұралатын елдегі ведомство өтінімдерді қабылдау үшін жабық болатын күн болса, мерзім одан кейінгі бірінші жұмыс күніне дейін ұзартылады.

(4) Басымдық мерзімін есептеу күні болып табылатын өтінім берілген күн ретінде, егер сол Одақ елінде бұрын берілген өтінім кейінгі өтінім берілген күні жария танысу үшін қолжетімді болмай, кері қайтарып алынған, қараусыз қалдырылған немесе қабылданбаған болса, сондай-ақ оған қатысты қандай да бір құқықтар сақталмаған және ол әлі басымдық құқығына талап қою үшін негіз болмаған жағдайда, жоғарыда келтірілген (2)-тармақтың мағынасында сол объектіге қатысты сол Одақ елінде кейіннен берілген өтінімнің күні есептелуге тиіс. Мұндай жағдайда бұрын берілген өтінім басымдық құқығына талап қою үшін негіз бола алмайды.

D. - (1) Бұрын берілген өтінім негізінде басымдық құқығының артықшылығын пайдаланғысы келетін кез келген тұлға өтінімнің берілген күні мен ол берілген елді көрсете отырып, өтініш беруге міндетті. Әрбір ел мұндай өтініштің қай уақытқа дейін берілуге тиіс екенін белгілейді.

(2) Бұл мәліметтер құзыретті мекеме шығаратын басылымдарда, атап айтқанда патенттер мен оларға қатысты сипаттамаларда көрсетілуге тиіс.

(3) Одақ елдері басымдық туралы өтініш беретін тұлғадан бұрын берілген өтінімнің көшірмесін (сипаттамасын, сызбаларын және т.б.) ұсынуды талап ете алады. Осы өтінімді қабылдаған мекеме куәландырған көшірме ешқандай заңдастыруды талап етпейді және кейінгі өтінім берілген күннен бастап үш ай ішінде кез келген уақытта ешқандай алым төленбестен ұсынылуы мүмкін. Онымен бірге осы мекеме берген өтінімнің берілген күні туралы анықтаманы және аударманы ұсынуды талап ету құқығы сақталады.

(4) Өтінім беру кезінде басымдық туралы өтінішке қатысты басқа формальдылықтарды орындау талап етілмейді. Одақтың әрбір елі осы бапта көзделген формальдылықтардың сақталмауы қандай салдарға әкелетінін белгілейді, алайда бұл салдар басымдық құқығынан айырылудан ауыр болмауға тиіс.

(5) Кейіннен басқа дәлелдемелер талап етілуі мүмкін.

Бұрын өтінім беру негізінде басымдық құқығына үміткер тұлға осы өтінімнің нөмірін көрсетуге тиіс; бұл мәлімет жоғарыда келтірілген (2)-тармақта көзделген тәртіппен жарияланады.

E. - (1) Өнеркәсіптік үлгіге өтінім пайдалы модельге өтінім беруге негізделген басымдық құқығын пайдалана отырып, елде берілген кезде, басымдық мерзімі өнеркәсіптік үлгілер үшін белгіленген мерзім болып табылады.

(2) Бұдан басқа, елде патентке өтінім беруге негізделген басымдық құқығын пайдалана отырып, пайдалы модельге өтінім беруге және керісінше, пайдалы модельге өтінім беруге негізделген басымдық құқығын пайдалана отырып, патентке өтінім беруге жол беріледі.

F. - Одақтың бірде-бір елі өтінім беруші бірнеше басымдыққа, оның ішінде әртүрлі елдерде белгіленген басымдықтарға талап қойғаны үшін немесе бір немесе бірнеше басымдыққа талап қойылған өтінімде басымдық сұратылған өтінімге немесе өтінімдерге енгізілмеген бір немесе бірнеше элемент қамтылғаны үшін патентке басымдықты мойындаудан бас тартуға немесе өтінімді қабылдамауға құқылы емес, егер екі жағдайда да сол елдің заңнамасына сәйкес өнертабыстың бірлігі сақталса.

Басымдық сұратылған өтінімге немесе өтінімдерге енгізілмеген элементтерге қатысты кейінгі өтінімді беру әдеттегі шарттарда басымдық құқығын туындатады.

G. - (1) Егер сараптама патентке өтінімнің кешенді екенін анықтаса, өтінім беруші өтінімді бірнеше жеке өтінімге бөле алады, бұл ретте олардың әрқайсысы үшін бастапқы өтінімнің берілген күні және тиісті жағдайларда басымдық құқығының артықшылығы сақталады.

(2) Өтінім беруші патентке өтінімді өз бастамасы бойынша да бөле алады, бұл ретте әрбір жеке өтінім үшін бастапқы өтінімнің берілген күні және тиісті жағдайларда басымдық құқығының артықшылығы сақталады. Мұндай бөлуге рұқсат етілетін шарттарды белгілеу құқығы Одақтың әрбір еліне беріледі.

H. - Басымдық құқығы басымдық сұратылатын өнертабыстың кейбір элементтері шыққан елдегі өтінімде көрсетілген талаптарда қамтылмаған деген себеппен қабылданбауы мүмкін емес, егер өтінім құжаттарының жиынтығында осы элементтер анық көрсетілген болса.

I. - (1) Өтінім берушілер өз таңдауы бойынша патент немесе өнертабысқа авторлық куәлік сұратуға құқылы елде өнертабысқа авторлық куәлік алу үшін берілген өтінімдер осы бапта көзделген басымдық құқығына патентке өтінімдермен бірдей шарттарда және бірдей салдарлармен негіз болады.

(2) Өтінім берушілер өз таңдауы бойынша патент немесе өнертабысқа авторлық куәлік сұратуға құқылы елде өнертабысқа авторлық куәлік алуға өтінім берген тұлға осы баптың патентке өтінімдерге қатысты ережелеріне сәйкес патентке, пайдалы модельге немесе өнертабысқа авторлық куәлікке берілген өтінімге негізделген басымдық құқығын пайдаланады.

4-bis-бап

(1) Одақ елдерінің азаматтары Одақтың әртүрлі елдерінде берген өтінімдер бойынша алынған патенттер сол өнертабысқа қатысты Одақ құрамына кіретін немесе кірмейтін басқа елдерде алынған патенттерден тәуелсіз болып табылады.

(2) Бұл ереже ешқандай шектеусіз қарастырылуға тиіс, атап айтқанда басымдық мерзімі ішінде берілген өтінімдер бойынша алынған патенттер олардың жарамсыз деп танылуы мен құқықтарының тоқтатылу негіздері тұрғысынан да, сондай-ақ олардың қалыпты қолданылу мерзімін айқындау тұрғысынан да бір-бірінен тәуелсіз болып табылады.

(3) Бұл ереже күшіне енген сәтте қолданыста болатын барлық патенттерге қатысты қолданылады.

(4) Ол сондай-ақ жаңа елдер қосылған жағдайда қосылу сәтінде екі тарапта да қолданыста болған патенттерге қатысты қолданылады.

(5) Басымдық құқығынан туындайтын артықшылықты пайдалана отырып алынған патенттердің Одақтың әртүрлі елдеріндегі қолданылу мерзімі, егер олар осы басымдық артықшылығынсыз өтінім берілген немесе берілген болса, ие болатын мерзіммен бірдей болады.

4-ter-бап

Өнертапқыш патентте өзінің өнертапқыш ретінде көрсетілу құқығына ие.

4-quater-бап

Патент беруден бас тартуға және патентті жарамсыз деп тануға патенттелген өнімді немесе патенттелген тәсілмен дайындалған өнімді сатуға ұлттық заңнама негізінде шектеулер немесе қысқартулар қойылғаны негіз бола алмайды.

5-бап

A. - (1) Патент иесінің Одақтың қандай да бір елінде өндірілген объектілерді патент берілген елге әкелуі патентке негізделген құқықтарынан айырылуға әкеп соқпайды.

(2) Одақтың әрбір елі патент беретін айрықша құқықты жүзеге асыру нәтижесінде туындауы мүмкін теріс пайдаланудың алдын алу үшін, мысалы, өнертабысты пайдаланбаған жағдайда, мәжбүрлі лицензиялар беруді көздейтін заңнамалық шаралар қабылдауға құқылы.

(3) Патент құқығынан айыру мәжбүрлі лицензиялар беру мұндай теріс пайдаланудың алдын алу үшін жеткіліксіз болған жағдайда ғана көзделуі мүмкін. Патент құқығынан айыру немесе патенттің күшін жою туралы ешқандай шара бірінші мәжбүрлі лицензия берілген сәттен бастап екі жыл өткенге дейін қолданылмайды.

(4) Пайдаланбау немесе жеткіліксіз пайдалану себебі бойынша мәжбүрлі лицензияны патентке өтінім берілген күннен бастап төрт жыл немесе патент берілген күннен бастап үш жыл өткенге дейін талап етуге болмайды, бұл ретте қайсысы кешірек аяқталса, сол мерзім қолданылады; егер патент иесі өзінің әрекетсіздігіне дәлелді себептер болғанын дәлелдесе, мәжбүрлі лицензия беруден бас тартылады. Мұндай мәжбүрлі лицензия айрықша емес лицензия болып табылады және тіпті сублицензия беру түрінде де берілуі мүмкін, бірақ тек осы лицензияны пайдаланатын өнеркәсіптік немесе сауда кәсіпорнының бір бөлігімен бірге ғана беріледі.

(5) Жоғарыда келтірілген ережелер қажетті өзгерістермен пайдалы модельдерге де қолданылады.

B. - Өнеркәсіптік үлгілерді қорғау оларды пайдаланбау немесе қорғалатын объектілерге ұқсас объектілерді әкелу салдарынан тоқтатылмайды.

C. - (1) Егер елде тіркелген белгіні пайдалану міндетті болса, тіркеу тек ақылға қонымды мерзім өткеннен кейін және мүдделі тұлға өзінің әрекетсіздігін ақтайтын себептерді дәлелдейтін құжаттарды ұсынбаған жағдайда ғана күшін жоюы мүмкін.

(2) Белгі иесінің Одақтың қандай да бір елінде тіркелген белгіден оның айырымдық сипатын өзгертпейтін жекелеген элементтерімен ғана ерекшеленетін нысанда тауар белгісін қолдануы тіркеудің жарамсыз деп танылуына әкеп соқпайды және белгіге берілген қорғауды шектемейді.

(3) Қорғау сұратылатын елдің заңнамасына сәйкес белгінің ортақ иелері ретінде қарастырылатын өнеркәсіптік немесе сауда кәсіпорындарының бірдей немесе ұқсас өнімдерде бір тауар белгісін бір мезгілде қолдануы, егер мұндай қолдану қоғамды жаңылыстырмаса және жария мүдделерге қайшы келмесе, белгіні тіркеуге кедергі келтірмейді және Одақтың қандай да бір елінде осы белгіге берілген қорғауды ешбір түрде шектемейді.

D. - Құқықтарды тану үшін өнімге патент, пайдалы модель, тауар белгісінің тіркелуі немесе өнеркәсіптік үлгінің депозитке тапсырылғаны туралы қандай да бір белгі немесе нұсқау қою талап етілмейді.

5-bis-бап

(1) Өнеркәсіптік меншік құқықтарын сақтау үшін көзделген баждарды төлеуге кемінде алты айды құрайтын жеңілдік мерзімі беріледі, бұл ретте ұлттық заңнамада белгіленген жағдайда қосымша баж төленуге тиіс.

(2) Одақ елдері баждардың төленбеуі салдарынан күшін жойған өнертабыстарға берілген патенттерді қалпына келтіруді көздеуге құқылы.

5-ter-бап

Одақтың әрбір елінде патент иесінің құқықтарын бұзу болып мыналар танылмайды:

1. Одақтың басқа елдерінің кемелері осы елдің суларында уақытша немесе кездейсоқ болған кезде, патент нысанасы болып табылатын құралдарды кеменің корпусында, машиналарында, жабдықтарында, механизмдерінде және басқа да жабдықтарында қолдану, егер бұл құралдар тек кеме қажеттіліктері үшін ғана пайдаланылса.

2. Одақтың басқа елдерінің әуе немесе жерүсті көлік құралдарының конструкциясында немесе оларды пайдалану кезінде, сондай-ақ осы көлік құралдарының қосалқы жабдықтарында патент нысанасы болып табылатын құралдарды қолдану, егер аталған көлік құралдары осы елде уақытша немесе кездейсоқ болған жағдайда.

5-quater-бап

Егер өнім Одақтың осы өнімді өндіру тәсілін қорғайтын патенті бар еліне әкелінсе, патент иесі әкелінген өнімге қатысты импорттаушы елдің заңнамасы оған осы елде өндірілген өнімдерге өндіріс тәсіліне берілген патент негізінде қандай құқықтар берсе, сондай құқықтардың барлығына ие болады.

5-quinquies-бап

Өнеркәсіптік үлгілер Одақтың барлық елдерінде қорғалады.

6-бап

(1) Тауар белгілеріне өтінім беру және оларды тіркеу шарттары Одақтың әрбір елінде оның ұлттық заңнамасымен айқындалады.

(2) Алайда Одақ елінің азаматы Одақтың басқа елінде мәлімдеген белгі оның шыққан елінде өтінім берілмеген, тіркелмеген немесе тіркеу мерзімі ұзартылмаған деген негізде қабылданбауы немесе жарамсыз деп танылуы мүмкін емес.

(3) Одақтың қандай да бір елінде тиісті түрде тіркелген белгі Одақтың басқа елдерінде, оның ішінде шыққан елінде тіркелген белгілерден тәуелсіз болып қарастырылады.

6-bis-бап

(1) Одақ елдері, егер бұл елдің заңнамасында рұқсат етілсе, әкімшілік органның бастамасы бойынша немесе мүдделі тұлғаның өтініші бойынша, осы Конвенцияның артықшылықтарын пайдаланатын тұлғаға тиесілі және тіркеуші елдің немесе қолданылатын елдің құзыретті органы осы елде бұрыннан белгілі деп таныған белгімен бірдей немесе ұқсас өнімдер үшін пайдаланылатын, онымен шатастыруға әкеп соғуы мүмкін басқа белгіні қайта шығаратын, оған еліктейтін немесе аударатын тауар белгісінің тіркелуінен бас тартуға немесе оны жарамсыз деп тануға және оның қолданылуына тыйым салуға міндеттенеді. Бұл ереже белгінің елеулі құрамдас бөлігі осындай жалпыға белгілі белгіні қайталау немесе онымен шатастыруға әкеп соғуы мүмкін еліктеу болып табылатын жағдайларға да қолданылады.

(2) Мұндай белгіні жарамсыз деп тану туралы талап қою үшін белгіні тіркеу күнінен бастап кемінде бес жылдық мерзім беріледі. Одақ елдері белгіні қолдануға тыйым салуды талап етуге болатын мерзімді белгілеуге құқылы.

(3) Адал емес ниетпен тіркелген немесе пайдаланылған белгілерді жарамсыз деп тану немесе қолдануға тыйым салу туралы талап қою үшін мерзім белгіленбейді.

6-ter-бап

(1) (a) Одақ елдері құзыретті билік органдарының рұқсатынсыз тауар белгілері немесе олардың элементтері ретінде Одақ елдерінің елтаңбаларын, тулары мен басқа да мемлекеттік эмблемаларын, олар енгізген ресми белгілер мен бақылау және кепілдік таңбаларын, сондай-ақ олардың геральдикалық тұрғыдан кез келген еліктеуін пайдалануға тыйым салу, тіркеуден бас тарту немесе тіркеуді жарамсыз деп тану үшін тиісті шаралар қолдануға уағдаласады.

(b) Жоғарыда (a) тармақшасында баяндалған ережелер бір немесе бірнеше Одақ елдері мүшелері болып табылатын халықаралық үкіметаралық ұйымдардың елтаңбаларына, туларына және басқа да эмблемаларына, қысқартылған немесе толық атауларына да бірдей қолданылады, бұған оларды қорғауды қамтамасыз етуге арналған қолданыстағы халықаралық келісімдердің нысанасы болып табылатын елтаңбалар, тулар және басқа да эмблемалар, қысқартылған немесе толық атаулар кірмейді.

(c) Одақтың бірде-бір елі осы Конвенцияның осы елде күшіне енуіне дейін адал ниетпен иеленген құқықтардың иелеріне зиян келтіре отырып, жоғарыда (b) тармақшасында баяндалған ережелерді қолдануға міндетті емес. Одақ елдері, егер жоғарыда (a) тармақшасында көзделген пайдалану немесе тіркеу қоғамда осы ұйым мен елтаңбалар, тулар, эмблемалар, қысқартылған немесе толық атаулар арасында байланыс бар деген түсінік қалыптастырмаса немесе мұндай пайдалану немесе тіркеу пайдаланушы мен ұйым арасындағы байланысқа қатысты қоғамды жаңылыстыруға анық бағытталмаса, аталған ережелерді қолдануға міндетті емес.

(2) Ресми бақылау және кепілдік белгілері мен таңбаларын пайдалануға тыйым салу оларды қамтитын белгілер сол тектес немесе ұқсас тауарларда пайдалануға арналған жағдайларға ғана қолданылады.

(3) (a) Осы ережелерді қолдану мақсатында Одақ елдері бір-біріне Халықаралық бюро арқылы осы баппен толық көлемде немесе белгілі бір шектеулермен қорғауға алғысы келетін немесе болашақта алатын мемлекеттік эмблемалардың, ресми белгілер мен бақылау және кепілдік таңбаларының тізімін хабарлауға, сондай-ақ осы тізімдерге енгізілетін барлық кейінгі өзгерістер туралы хабарлауға уағдаласады. Одақтың әрбір елі өзіне жіберілген белгілерді қоғамның назарына уақтылы ұсынады.

Алайда мемлекеттік туларға қатысты мұндай хабарлама міндетті емес.

(b) Осы баптың (1)-тармағының (b) тармақшасында келтірілген ережелер тек халықаралық үкіметаралық ұйымдардың өздері Халықаралық бюро арқылы Одақ елдеріне хабарлаған елтаңбаларына, туларына және басқа да эмблемаларына, қысқартылған немесе толық атауларына ғана қолданылады.

(4) Одақтың әрбір елі хабарламаны алған сәттен бастап он екі ай ішінде Халықаралық бюро арқылы мүдделі елге немесе халықаралық үкіметаралық ұйымға өзінің ықтимал қарсылықтарын жібере алады.

(5) Мемлекеттік туларға қатысты жоғарыда көрсетілген (1)-тармақта көзделген шаралар тек 1925 жылғы 6 қарашадан кейін тіркелген белгілерге қолданылады.

(6) Мемлекеттік эмблемаларға, тулардан басқа, сондай-ақ Одақ елдерінің ресми белгілері мен таңбаларына, халықаралық үкіметаралық ұйымдардың елтаңбаларына, туларына және басқа да эмблемаларына, қысқартылған немесе толық атауларына қатысты бұл ережелер жоғарыда көрсетілген (3)-тармақта көзделген хабарламаны алғаннан кейін екі ай өткен соң тіркелген белгілерге ғана қолданылады.

(7) Адал емес әрекеттер болған жағдайда елдер 1925 жылғы 6 қарашаға дейін тіркелген, құрамында мемлекеттік эмблемалар, белгілер мен таңбалар бар белгілерді де жарамсыз деп тануға құқылы.

(8) Өз елдерінің мемлекеттік эмблемаларын, ресми белгілері мен таңбаларын пайдалануға рұқсаты бар әрбір елдің азаматтары олар басқа елдің осындай белгілеріне ұқсас болған жағдайда да оларды пайдалана алады.

(9) Одақ елдері рұқсат болмаған кезде басқа Одақ елдерінің мемлекеттік елтаңбаларын саудада пайдалануға тыйым салуға міндеттенеді, егер мұндай пайдалану өнімнің шығу тегіне қатысты жаңылыстыруы мүмкін болса.

(10) Жоғарыда көрсетілген ережелер елдердің 6-quinquies-баптың B бөлімінің (3)-тармағында көзделген, Одақ елінде қабылданған елтаңбалар, тулар және басқа да мемлекеттік эмблемалар немесе ресми белгілер мен таңбалар, сондай-ақ жоғарыда көрсетілген (1)-тармақта аталған халықаралық үкіметаралық ұйымдардың айырым белгілері рұқсатсыз енгізілген белгілерді тіркеуден бас тарту немесе тіркеуді жарамсыз деп тану құқығын жүзеге асыруына кедергі келтірмейді.

6-quater-бап

(1) Одақ елінің заңнамасына сәйкес белгіні беру ол тиесілі өнеркәсіптік немесе сауда кәсіпорнын берумен бір мезгілде жүзеге асырылған жағдайда ғана жарамды болса, мұндай беруді жарамды деп тану үшін сол елде орналасқан өнеркәсіптік немесе сауда кәсіпорнының бір бөлігін белгімен таңбаланған өнімдерді өндірудің немесе сатудың айрықша құқығымен бірге сатып алушыға беру жеткілікті болып табылады.

(2) Бұл ереже Одақ елдеріне сатып алушының пайдалануы іс жүзінде қоғамды, атап айтқанда, өнімдердің шығу тегі, сипаты немесе елеулі қасиеттері жөнінде жаңылыстыруы мүмкін белгіні беруді жарамды деп тану міндетін жүктемейді.

6-quinquies-бап

A. - (1) Шыққан елінде тиісті түрде тіркелген әрбір тауар белгісі осы бапта көрсетілген ескертпелерді ескере отырып, Одақтың басқа елдерінде де мәлімделуі мүмкін және сол күйінде қорғалады. Бұл елдер тіркеуді түпкілікті ресімдегенге дейін құзыретті мекеме берген шыққан еліндегі тіркеу туралы куәлікті ұсынуды талап ете алады. Мұндай куәлікті заңдастыру талап етілмейді.

(2) Шыққан ел деп өтінім берушінің нақты әрі шынайы өнеркәсіптік немесе сауда кәсіпорны орналасқан Одақ елі, ал егер оның Одақ аумағында мұндай кәсіпорны болмаса – тұрғылықты жері орналасқан Одақ елі, ал егер оның Одақ аумағында тұрғылықты жері болмаса – егер ол Одақ елінің азаматы болса, оның азаматтығы тиесілі ел танылады.

B. - Осы баптың қолданылу аясына жататын тауар белгілерін тіркеуден тек мынадай жағдайларда ғана бас тартылуы немесе олар жарамсыз деп танылуы мүмкін:

1) егер белгілер қорғау сұратылатын елде үшінші тұлғалар алған құқықтарға нұқсан келтіруі мүмкін болса;

2) егер белгілер қандай да бір айырымдық белгілерден айырылған болса немесе тек саудада өнімнің түрін, сапасын, санын, мақсатын, құнын, шығу орнын немесе өндірілген уақытын белгілеу үшін қызмет ете алатын белгілерден немесе нұсқаулардан ғана тұрса, не қорғау сұратылатын елдің күнделікті тілінде немесе адал әрі орныққан сауда әдет-ғұрыптарында жалпыға ортақ сипатқа ие болса;

3) егер белгілер моральға немесе жария тәртіпке қайшы келсе және, атап айтқанда, қоғамды жаңылыстыруы мүмкін болса. Белгі тек белгілер туралы заңнаманың қандай да бір ережесіне сәйкес келмегені үшін ғана жария тәртіпке қайшы деп қарастырылмайды, бұған осы ереженің өзі жария тәртіпке қатысты болатын жағдай кірмейді.

Алайда 10-bis-баптың қолданылуы сақталады.

C. - (1) Белгінің қорғау нысанасы бола алатынын анықтау үшін барлық нақты мән-жайлар, әсіресе белгіні қолдану ұзақтығы ескерілуге тиіс.

(2) Одақтың басқа елдерінде тауар белгілерін олардың шыққан елінде қорғалатын белгілерден тек белгілердің айырымдық сипатын өзгертпейтін және шыққан елде тіркелген нысанындағы белгілердің бірдейлігіне нұқсан келтірмейтін элементтерімен ғана ерекшеленетіндігі негізінде қабылдаудан бас тартуға болмайды.

D. - Егер қорғау сұратылатын белгі шыққан елде тіркелмеген болса, ешкім осы баптың ережелерін пайдалана алмайды.

E. - Алайда белгіні шыққан елде тіркеуді жаңарту Одақтың белгі тіркелген басқа елдерінде тіркеуді жаңарту міндетін ешбір жағдайда туындатпайды.

F. - Басымдық құқығынан туындайтын артықшылықтар, егер белгіні шыққан елде тіркеу осы мерзім өткеннен кейін жүзеге асырылса да, 4-бапта көрсетілген мерзім ішінде белгіні тіркеуге берілген өтінімдерге қатысты сақталады.

6-sexies-бап

Одақ елдері қызмет көрсету белгілерін қорғауға міндеттенеді. Олар бұл белгілерді тіркеуді көздеуге міндетті емес.

6-septies-бап

(1) Егер Одақ елдерінің біріндегі белгі иесінің агенті немесе өкілі иесінің рұқсатынсыз осы белгіні бір немесе бірнеше осындай елде өз атынан тіркеуге өтінім берсе, иесі, егер агент немесе өкіл өз әрекетін ақтайтын дәлелдер ұсынбаса, тіркеуге қарсылық білдіруге немесе оны жоюды талап етуге не, егер елдің заңнамасы рұқсат етсе, тіркеуді өз пайдасына қайта ресімдеуді талап етуге құқылы.

(2) Белгі иесі (1)-тармақта көзделген шарттар болған кезде, егер ол мұндай пайдалануға келісім бермесе, агенттің немесе өкілдің белгіні пайдалануына қарсылық білдіруге құқылы.

(3) Ұлттық заңнамада белгі иесінің осы бапта көзделген құқықтарын пайдалануға тиіс әділ мерзім белгіленуі мүмкін.

7-бап

Тауар белгісі арналған өнімнің сипаты ешбір жағдайда белгіні тіркеуге кедергі бола алмайды.

7-bis-бап

(1) Одақ елдері шыққан елінің заңнамасына қайшы келмейтін, тіпті өнеркәсіптік немесе сауда кәсіпорнының иелері болып табылмайтын ұжымдарға тиесілі ұжымдық белгілерді тіркеуге өтінімдерді қабылдауға және оларды қорғауға міндеттенеді.

(2) Әрбір ел ұжымдық белгіні қорғаудың ерекше шарттарын өзі айқындайды және егер бұл белгі жария мүдделерге қайшы келсе, оны қорғаудан бас тарта алады.

(3) Алайда шыққан елінің заңнамасына қайшы келмейтін ұжымның мұндай белгілерін қорғаудан осы ұжым қорғау сұратылатын елде орналаспағаны немесе сол елдің заңнамасына сәйкес құрылмағаны негізінде бас тартуға болмайды.

8-бап

Фирмалық атау Одақтың барлық елдерінде өтінім беру немесе тіркеу міндетінсіз және оның тауар белгісінің құрамдас бөлігі болып табылатынына қарамастан қорғалады.

9-бап

(1) Тауар белгісімен немесе фирмалық атаумен заңсыз таңбаланған кез келген өнім осы белгі немесе фирмалық атау заңды түрде қорғалатын Одақ елдеріне әкелінген кезде тәркіленеді.

(2) Сол сияқты тәркілеу заңсыз таңбалау жүзеге асырылған елде немесе өнім әкелінген елдерде де жүргізіледі.

(3) Тәркілеу әрбір елдің ішкі заңнамасына сәйкес прокуратураның немесе кез келген басқа құзыретті органның не мүдделі тараптың – жеке немесе заңды тұлғаның талабы бойынша жүргізіледі.

(4) Билік органдары өнімдерді транзитпен өткізу жағдайында тәркілеу жүргізуге міндетті емес.

(5) Егер елдің заңнамасы әкелу кезінде тәркілеуге жол бермесе, тәркілеу әкелуге тыйым салумен немесе ел ішінде тәркілеумен ауыстырылады.

(6) Егер елдің заңнамасы әкелу кезінде тәркілеуге де, әкелуге тыйым салуға да, ел ішінде тәркілеуге де жол бермесе, онда тиісті заңнамаға өзгерістер енгізілгенге дейін бұл шаралар сол елдің заңнамасы осындай жағдайда өз азаматтарының құқықтарын қамтамасыз ететін әрекеттермен және құралдармен ауыстырылады.

10-бап

(1) Алдыңғы баптың ережелері өнімдердің шығу тегі немесе дайындаушының, өнеркәсіпшінің немесе саудагердің жеке басының шынайылығы туралы жалған нұсқауларды тікелей немесе жанама пайдаланған жағдайда қолданылады.

(2) Мүдделі тарап деп оның жеке немесе заңды тұлға екеніне қарамастан, осы өнімді өндірумен, дайындаумен немесе өткізумен айналысатын және өнімнің шығу орны ретінде жалған көрсетілген жерде не сол жер орналасқан ауданда, не жалған көрсетілген елде немесе шығу тегі туралы жалған нұсқау қолданылатын елде орналасқан кез келген дайындаушы, өнеркәсіпші немесе саудагер танылады.

10-bis-бап

(1) Одақ елдері Одаққа қатысушы елдердің азаматтарына жосықсыз бәсекелестіктен тиімді қорғауды қамтамасыз етуге міндетті.

(2) Жосықсыз бәсекелестік актісі деп өнеркәсіптік және сауда істеріндегі адал әдет-ғұрыптарға қайшы келетін кез келген бәсекелестік әрекеті танылады.

(3) Атап айтқанда, мыналарға тыйым салынуға тиіс:

1) бәсекелестің кәсіпорнына, өнімдеріне немесе өнеркәсіптік немесе сауда қызметіне қатысты кез келген тәсілмен шатастыруға әкеп соғуы мүмкін барлық әрекеттер;

2) коммерциялық қызметті жүзеге асыру кезінде бәсекелестің кәсіпорнының, өнімдерінің немесе өнеркәсіптік немесе сауда қызметінің беделін түсіруі мүмкін жалған мәлімдемелер;

3) коммерциялық қызметті жүзеге асыру кезінде пайдаланылуы қоғамды тауарлардың сипатына, дайындалу тәсіліне, қасиеттеріне, қолдануға жарамдылығына немесе санына қатысты жаңылыстыруы мүмкін нұсқаулар немесе мәлімдемелер.

10-ter-бап

(1) Одақ елдері басқа Одақ елдерінің азаматтарына 9, 10 және 10-bis-баптарда көрсетілген барлық әрекеттердің жолын тиімді кесу үшін заңды құралдарды қамтамасыз етуге міндеттенеді.

(2) Бұдан басқа, олар өз елдерінің заңдарына қайшы келмейтін және мүдделі өнеркәсіпшілердің, дайындаушылардың немесе саудагерлердің мүдделерін білдіретін одақтар мен бірлестіктерге 9, 10 және 10-bis-баптарда көзделген әрекеттердің жолын кесу мақсатында сот немесе әкімшілік органдар арқылы әрекет етуге мүмкіндік беретін шараларды, қорғау сұратылатын елдің заңнамасы сол елдің одақтары мен бірлестіктеріне мұндай құқық берген көлемде, көздеуге міндеттенеді.

11-бап

(1) Одақ елдері өздерінің ішкі заңнамасына сәйкес осы елдердің бірінің аумағында ұйымдастырылған ресми немесе ресми түрде танылған халықаралық көрмелерде қойылған патентке қабілетті өнертабыстарға, пайдалы модельдерге, өнеркәсіптік үлгілерге, сондай-ақ көрмеге қойылған өнімдердің тауар белгілеріне уақытша қорғау береді.

(2) Бұл уақытша қорғау 4-бапта белгіленген мерзімдерді ұзартпайды. Егер кейіннен басымдық құқығы талап етілсе, әрбір елдің құзыретті мекемесі мерзімді өнімнің көрмеге қойылған күнінен бастап есептей алады.

(3) Әрбір ел көрмеге қойылған заттың сәйкестігін және оның көрмеге қойылған күнін дәлелдеу үшін өзі қажет деп санайтын құжаттарды талап ете алады.

12-бап

(1) Одақтың әрбір елі өнеркәсіптік меншік істері жөніндегі арнайы қызметті және өнертабыстарға берілген патенттермен, пайдалы модельдермен, өнеркәсіптік үлгілермен және тауар белгілерімен қоғамның танысуына арналған орталық қойманы құруға міндеттенеді.

(2) Бұл қызмет ресми мерзімді бюллетень шығарады. Ол тұрақты түрде мыналарды жариялайды:

(a) берілген патенттердің иелерінің тегі мен аттарын, патенттелген өнертабыстардың қысқаша атауларымен бірге;

(b) тіркелген белгілердің көшірмелерін.

13-бап

(1) (a) Одақтың 13-тен 17-ге дейінгі баптармен байланысты елдерден тұратын Ассамблеясы болады.

(b) Әрбір елдің үкіметін бір делегат білдіреді, оның орынбасарлары, кеңесшілері мен сарапшылары болуы мүмкін.

(c) Әрбір делегацияның шығыстарын оны тағайындаған үкімет көтереді.

(2) (a) Ассамблея:

(i) Одақты сақтау мен дамытуға және осы Конвенцияны қолдануға қатысты барлық мәселелерді қарайды;

(ii) Дүниежүзілік зияткерлік меншік ұйымын құру туралы Конвенцияда (бұдан әрі «Ұйым» деп аталатын) көзделген Зияткерлік меншік жөніндегі халықаралық бюроға (бұдан әрі «Халықаралық бюро» деп аталатын) қайта қарау конференцияларын дайындауға қатысты нұсқаулар береді, бұл ретте 13-тен 17-ге дейінгі баптармен байланысты емес Одақ елдерінің ескертулерін тиісті түрде ескереді;

(iii) Ұйымның Бас директорына қатысты Одақ жөніндегі есептері мен қызметін қарайды және бекітеді, сондай-ақ оған Одақтың құзыретіне кіретін мәселелер бойынша барлық қажетті нұсқаулар береді;

(iv) Ассамблеяның Атқарушы комитетінің мүшелерін сайлайды;

(v) Атқарушы комитетінің есептері мен қызметін қарайды және бекітеді, сондай-ақ оған нұсқаулар береді;

(vi) бағдарламаны айқындайды, Одақтың екі жылдық бюджетін қабылдайды және оның қаржылық есептерін бекітеді;

(vii) Одақтың қаржылық регламентін бекітеді;

(viii) Одақтың мақсаттарын жүзеге асыру үшін қажет деп санайтын сарапшылар комитеттері мен жұмыс топтарын құрады;

(ix) Одаққа мүше болып табылмайтын қандай елдерге және қандай үкіметаралық әрі халықаралық үкіметтік емес ұйымдарға оның отырыстарына бақылаушылар ретінде қатысуға рұқсат етілетінін айқындайды;

(x) 13-тен 17-ге дейінгі баптарға түзетулер қабылдайды;

(xi) Одақтың мақсаттарына қол жеткізуге бағытталған кез келген басқа да тиісті әрекеттерді жүзеге асырады;

(xii) осы Конвенциядан туындайтын барлық басқа функцияларды орындайды;

(xiii) өзінің келісімі болған жағдайда, Ұйымды құру туралы Конвенциямен өзіне берілген құқықтарды жүзеге асырады.

(b) Әкімшілігін Ұйым жүзеге асыратын басқа Одақтар үшін де мүдделі мәселелер бойынша Ассамблея Ұйымның Үйлестіру комитетінің пікірін тыңдағаннан кейін шешімдер қабылдайды.

(3) (a) (b) тармақшасының ережелерін сақтай отырып, делегат тек бір елдің атынан өкілдік ете алады.

(b) Арнайы келісімге сәйкес бірігіп, олардың әрқайсысы үшін 12-бапта көзделген өнеркәсіптік меншік жөніндегі арнайы ұлттық қызметтің маңызын атқаратын ортақ ведомство құрған Одақ елдері талқылау кезінде бірлесіп олардың біреуінің атынан өкілдік ете алады.

(4) (a) Ассамблея мүшесі болып табылатын әрбір елдің бір дауысы болады.

(b) Ассамблея мүшелері болып табылатын елдердің жартысы кворум құрайды.

(c) (b) тармақшасының ережесіне қарамастан, егер қандай да бір сессияда өкілдік ететін елдердің саны жартысынан аз, бірақ Ассамблея мүшелері болып табылатын елдердің үштен біріне тең немесе одан көп болса, Ассамблея шешімдер қабылдай алады, алайда Ассамблеяның өзінің рәсімдік қағидаларына қатысты шешімдерін қоспағанда, барлық шешімдер төмендегі шарттар сақталған жағдайда ғана күшіне енеді. Халықаралық бюро аталған шешімдерді Ассамблея мүшелері болып табылатын, бірақ оған қатыспаған елдерге жібереді және оларды шешімдер жіберілген күннен бастап үш ай ішінде осы шешімдерді қолдайтыны, оларға қарсы дауыс беретіні немесе қалыс қалатыны туралы жазбаша түрде хабарлауға шақырады. Егер осы мерзім аяқталғаннан кейін осылайша дауыс берген немесе қалыс қалғанын хабарлаған елдердің саны сессияның өзінде кворумға қол жеткізу үшін жетіспеген санға жетсе, мұндай шешімдер бір мезгілде қажетті көпшілік сақталған жағдайда күшіне енеді.

(d) 17-баптың (2)-тармағының ережелерін сақтай отырып, Ассамблея өз шешімдерін берілген дауыстардың үштен екі көпшілігімен қабылдайды.

(e) Қалыс қалғандардың дауыстары есепке алынбайды.

(5) (a) (b) тармақшасында көзделген жағдайларды қоспағанда, делегат тек бір елдің атынан дауыс бере алады.

(b) (3) (b)-тармақта көзделген Одақ елдері, әдетте, Ассамблея сессияларында өздерінің жеке делегацияларымен өкілдік етуге ұмтылуға тиіс. Алайда, ерекше жағдайларға байланысты аталған елдердің бірі өзінің жеке делегациясымен өкілдік ете алмаса, ол басқа осындай елдердің бірінің делегациясына өзінің атынан дауыс беру өкілеттігін беруге құқылы, бұл ретте бір делегация сенімхат бойынша тек бір ел үшін ғана дауыс бере алады. Мұндай өкілеттіктер мемлекет басшысы немесе құзыретті министр қол қойған құжатта айқындалуға тиіс.

(6) Ассамблея мүшелері болып табылмайтын Одақ елдері оның отырыстарына бақылаушылар ретінде қатысуға жіберіледі.

(7) (a) Ассамблея Бас директордың шақыруы бойынша екі жылда бір рет кезекті сессияға жиналады және ерекше жағдайларды қоспағанда, Ұйымның Бас Ассамблеясымен бір уақытта және бір жерде өткізіледі.

(b) Ассамблея Бас директор шақыратын кезектен тыс сессияға Атқарушы комитеттің немесе Ассамблея мүшелері болып табылатын елдердің төрттен бірінің талабы бойынша жиналады.

(8) Ассамблея өзінің рәсімдік қағидаларын қабылдайды.

14-бап

(1) Ассамблеяның Атқарушы комитеті болады.

(2) (a) Атқарушы комитет Ассамблея сайлаған Ассамблея мүшелері болып табылатын елдерден тұрады. Бұдан басқа, Ұйымның штаб-пәтері орналасқан елдің 16-баптың (7) (b) тармақшасының ережелерін сақтай отырып, Комитетте лауазымы бойынша бір орны болады.

(b) Атқарушы комитеттің мүшесі болып табылатын әрбір елдің үкіметін бір делегат білдіреді, оның орынбасарлары, кеңесшілері мен сарапшылары болуы мүмкін.

(c) Әрбір делегацияның шығыстарын оны тағайындаған үкімет көтереді.

(3) Атқарушы комитет мүшелері болып табылатын елдердің саны Ассамблея мүшелері болып табылатын елдер санының төрттен бірін құрайды. Толтырылуға жататын орындардың санын айқындау кезінде төртке бөлгеннен кейін алынатын қалдық есепке алынбайды.

(4) Атқарушы комитет мүшелерін сайлау кезінде Ассамблея әділ географиялық бөлініске, сондай-ақ Одаққа байланысты жасалған арнайы келісімдерге қатысушы елдердің Атқарушы комитетті құрайтын елдер қатарында болу қажеттілігіне тиісті назар аударады.

(5) (a) Атқарушы комитеттің мүшелері өз функцияларын өздері сайланған Ассамблея сессиясы жабылған сәттен бастап Ассамблеяның келесі кезекті сессиясы жабылғанға дейін жүзеге асырады.

(b) Атқарушы комитеттің мүшелері қайта сайлана алады, бірақ олардың саны құрамының үштен екісінен аспауға тиіс.

(c) Ассамблея Атқарушы комитет мүшелерін сайлаудың және ықтимал қайта сайлаудың егжей-тегжейлі қағидаларын белгілейді.

(6) (a) Атқарушы комитет:

(i) Ассамблеяның күн тәртібінің жобасын дайындайды;

(ii) Бас директор дайындаған Одақ бағдарламасы мен екі жылдық бюджетінің жобаларына қатысты ұсыныстарды Ассамблеяға ұсынады;

(iii) [алып тасталды];

(iv) Бас директордың мерзімді есептерін және қаржылық тексерулердің жыл сайынғы актілерін тиісті ескертулерімен бірге Ассамблеяға ұсынады;

(v) Ассамблеяның шешімдеріне сәйкес және Ассамблеяның екі кезекті сессиясы арасындағы кезеңде туындаған мән-жайларды ескере отырып, Бас директордың Одақ бағдарламасын орындауын қамтамасыз ету үшін барлық қажетті шараларды қабылдайды;

(vi) осы Конвенцияға сәйкес өзіне жүктелген барлық басқа функцияларды орындайды.

(b) Әкімшілігін Ұйым жүзеге асыратын басқа Одақтар үшін де мүдделі мәселелер бойынша Атқарушы комитет Ұйымның Үйлестіру комитетінің пікірін тыңдағаннан кейін шешімдер қабылдайды.

(7) (a) Атқарушы комитет Бас директордың шақыруы бойынша жылына бір рет кезекті сессияға, мүмкіндігінше Ұйымның Үйлестіру комитетімен бір уақытта және бір жерде жиналады.

(b) Атқарушы комитет Бас директордың өз бастамасы бойынша немесе Төрағаның өтініші бойынша не Атқарушы комитет мүшелерінің төрттен бірінің талабы бойынша шақырылатын кезектен тыс сессияға жиналады.

(8) (a) Атқарушы комитеттің мүшесі болып табылатын әрбір елдің бір дауысы болады.

(b) Атқарушы комитет мүшелері болып табылатын елдердің жартысы кворум құрайды.

(c) Шешімдер берілген дауыстардың жай көпшілігімен қабылданады.

(d) Қалыс қалғандардың дауыстары есепке алынбайды.

(e) Делегат тек бір елдің атынан өкілдік ете алады және тек сол елдің атынан дауыс бере алады.

(9) Атқарушы комитеттің мүшелері болып табылмайтын Одақ елдері оның отырыстарына бақылаушылар ретінде қатысуға жіберіледі.

(10) Атқарушы комитет өзінің рәсімдік қағидаларын қабылдайды.

15-бап

(1) (a) Одақтың әкімшілік міндеттерін Әдеби және көркем туындыларды қорғау жөніндегі халықаралық конвенциямен құрылған Одақ бюросымен біріктірілген Одақ бюросының құқықтық мирасқоры болып табылатын Халықаралық бюро жүзеге асырады.

(b) Халықаралық бюро, атап айтқанда, Одақтың әртүрлі органдарының Хатшылығы функцияларын орындайды.

(c) Ұйымның Бас директоры Одақтың жоғары лауазымды тұлғасы болып табылады және Одақтың атынан өкілдік етеді.

(2) Халықаралық бюро өнеркәсіптік меншікті қорғауға қатысты ақпаратты жинайды және жариялайды. Одақтың әрбір елі Халықаралық бюроға өнеркәсіптік меншікті қорғауға қатысты әрбір жаңа заңның мәтінін және барлық ресми мәтіндерді дереу жібереді. Бұдан басқа, ол Халықаралық бюроға өнеркәсіптік меншік саласындағы өз құзыретті қызметтерінің өнеркәсіптік меншікті қорғауға тікелей қатысы бар және Халықаралық бюро өз қызметі үшін пайдалы деп табуы мүмкін барлық жарияланымдарын жолдайды.

(3) Халықаралық бюро ай сайынғы журнал шығарады.

(4) Халықаралық бюро Одақтың кез келген елінің сұрауы бойынша өнеркәсіптік меншікті қорғау мәселелері жөнінде мәліметтер береді.

(5) Халықаралық бюро өнеркәсіптік меншікті қорғауды жеңілдетуге арналған зерттеулер жүргізеді және қызметтер көрсетеді.

(6) Бас директор және ол тағайындаған кез келген қызметкер Ассамблеяның, Атқарушы комитеттің және кез келген сарапшылар комитетінің немесе жұмыс тобының барлық отырыстарына дауыс беру құқығынсыз қатысады. Бас директор немесе ол тағайындаған қызметкер өз лауазымына сәйкес осы органдардың хатшысы болып табылады.

(7) (a) Халықаралық бюро Ассамблеяның нұсқауларына сәйкес және Атқарушы комитетпен ынтымақтастықта Конвенцияның 13-тен 17-ге дейінгі баптарында қамтылмаған ережелерін қайта қарау жөніндегі конференцияларды дайындайды.

(b) Халықаралық бюро қайта қарау жөніндегі конференцияларды дайындау мәселелері бойынша үкіметаралық және халықаралық үкіметтік емес ұйымдармен консультациялар өткізе алады.

(c) Бас директор және ол тағайындаған тұлғалар бұл конференциялардың жұмысына дауыс беру құқығынсыз қатысады.

(8) Халықаралық бюро өзіне жүктелген кез келген басқа міндеттерді орындайды.

16-бап

(1) (a) Одақтың бюджеті болады.

(b) Одақтың бюджетіне Одақтың өз кірістері мен шығыстары, оның Одақтар үшін ортақ шығыстар бюджетіне қосатын жарнасы, сондай-ақ тиісті жағдайларда Ұйым конференциясының бюджетіне аударымдар кіреді.

(c) Одақтар үшін ортақ шығыстар деп тек осы Одаққа ғана емес, сонымен бірге әкімшілігін Ұйым жүзеге асыратын бір немесе бірнеше басқа Одақтарға да қатысты шығыстар танылады. Одақтың осы ортақ шығыстардағы үлесі оның аталған шығыстарға мүдделілігіне сәйкес келеді.

(2) Одақтың бюджеті әкімшілігін Ұйым жүзеге асыратын басқа Одақтардың бюджеттерімен үйлестіру талаптары тиісті түрде ескеріле отырып қабылданады.

(3) Одақтың бюджеті мынадай көздерден қаржыландырылады:

(i) Одақ елдерінің жарналары;

(ii) Халықаралық бюроның Одаққа қатысты көрсететін қызметтері үшін алымдар мен төлемдер;

(iii) Халықаралық бюроның Одаққа қатысты жарияланымдарын сатудан және осындай жарияланымдарға құқықтарды беруден түсетін кірістер;

(iv) сыйлықтар, өсиет бойынша берілген қаражат және субсидиялар;

(v) рента, пайыздар және әртүрлі басқа да кірістер.

(4) (a) Бюджетке төленетін жарнасын айқындау үшін әрбір Одақ елі белгілі бір сыныпқа жатқызылады және өзінің жылдық жарнасын төмендегідей белгіленген бірліктер саны негізінде төлейді:

I сынып .......... 25

II сынып .......... 20

III сынып .......... 15

IV сынып .......... 10

V сынып .......... 5

VI сынып .......... 3

VII сынып .......... 1

(b) Егер ел бұрын мұны жасамаған болса, ол ратификациялау грамотасын немесе қосылу туралы актіні сақтауға тапсырған кезде бір мезгілде қай сыныпқа жатқызылғысы келетінін көрсетеді. Кез келген ел өзінің сыныбын өзгерте алады. Егер ел төменірек сыныпты таңдаса, ол бұл туралы Ассамблеяның кезекті сессиясында мәлімдеуге тиіс. Мұндай өзгеріс аталған сессиядан кейінгі күнтізбелік жылдың басынан бастап күшіне енеді.

(c) Әрбір елдің жылдық жарнасы барлық жарна төлеуші елдер төлеуге тиіс Одақ бюджетіне арналған жарналардың жалпы сомасындағы оның үлесіне оның бірліктер санының барлық жарна төлеуші елдердің бірліктерінің жалпы санына қатынасы негізінде тең болады.

(d) Жарналар әр жылдың бірінші қаңтарынан бастап төленуге тиіс.

(e) Жарналарды төлеу бойынша берешегі бар ел, егер оның берешек сомасы алдыңғы екі толық жыл үшін төленуге тиіс жарналар сомасына тең немесе одан асып кетсе, өзі мүше болып табылатын Одақтың барлық органдарында дауыс беру құқығынан айырылады. Алайда, егер осы органдардың кез келгені төлемнің кешіктірілуі ерекше әрі болдырмауға болмайтын мән-жайлардың салдарынан болғанына көз жеткізсе, ол мұндай елге дауыс беру құқығын пайдалануды жалғастыруға рұқсат бере алады.

(f) Егер жаңа қаржы кезеңі басталғанға дейін бюджет қабылданбаса, қаржылық регламентте көзделген тәртіпке сәйкес алдыңғы жылдың бюджеті деңгейіндегі бюджет қолданылады.

(5) Халықаралық бюроның Одақ атынан көрсететін қызметтері үшін төленуге жататын алымдар мен төлемдердің мөлшерін Бас директор белгілейді, ол бұл туралы Ассамблея мен Атқарушы комитетке есеп береді.

(6) (a) Одақтың айналым қаражаты қоры болады, ол Одақтың әрбір елі енгізетін біржолғы төлемдерден құралады. Егер айналым қаражаты қоры жеткіліксіз болып қалса, Ассамблея оны ұлғайту мәселесін шешеді.

(b) Әрбір елдің аталған қорға бастапқы төлемінің мөлшері немесе осы қорды ұлғайтуға арналған оның үлесі қор құрылған немесе оны ұлғайту туралы шешім қабылданған жылдағы осы елдің жарнасына пропорционалды болады.

(c) Бұл пропорция мен төлем шарттарын Ұйымның Үйлестіру комитетінің пікірін тыңдағаннан кейін Бас директордың ұсынысы бойынша Ассамблея белгілейді.

(7) (a) Ұйымның штаб-пәтері орналасқан елмен жасалатын штаб-пәтер туралы келісімде айналым қаражаты қоры жеткіліксіз болған жағдайларда осы елдің аванстар беруі көзделеді. Бұл аванстардың сомасы мен оларды беру шарттары әрбір жағдайда осындай ел мен Ұйым арасындағы жеке келісімнің нысанасы болып табылады. Мұндай ел аванстар беру жөніндегі міндеттемемен байланысты болған уақыт ішінде оның Атқарушы комитетте лауазымы бойынша бір орны болады.

(b) (a) тармақшасында аталған ел де, Ұйым да жазбаша хабарлама жіберу арқылы аванстар беру жөніндегі міндеттемеден бас тартуға құқылы. Бас тарту хабарлама жіберілген жылдың аяқталуынан кейін үш жыл өткен соң күшіне енеді.

(8) Қаржылық аудит қаржылық регламенттің қағидаларына сәйкес Одақтың бір немесе бірнеше елі немесе Ассамблея олардың келісімімен тағайындаған сыртқы аудиторлар арқылы жүзеге асырылады.

17-бап

(1) 13, 14, 15, 16-баптарға және осы бапқа түзетулер енгізу туралы ұсыныстарды Ассамблеяның кез келген мүшесі болып табылатын ел, Атқарушы комитет немесе Бас директор енгізе алады. Мұндай ұсыныстарды Бас директор Ассамблея қарауына жібергенге дейін кемінде алты ай бұрын Ассамблея мүшелері болып табылатын елдерге жолдайды.

(2) (1)-тармақта көзделген баптарға кез келген түзету Ассамблеяның берілген дауыстардың төрттен үш көпшілігімен қабылданады; алайда 13-бапқа және осы тармаққа кез келген түзету берілген дауыстардың бестен төрт көпшілігімен қабылданады.

(3) (1)-тармақта көзделген баптарға кез келген түзету әрбір елдің конституциялық рәсіміне сәйкес жүзеге асырылған оны қабылдау туралы жазбаша хабарламаларды Бас директор осы түзетуді қабылдау кезінде Ассамблея мүшелері болған елдердің төрттен үшінен алғаннан кейін бір ай өткен соң күшіне енеді. Осылайша қабылданған кез келген түзету түзету күшіне енген кезде Ассамблея мүшелері болып табылатын немесе осы күннен кейін оның мүшесі болатын барлық елдер үшін міндетті болады; алайда Одақ елдерінің қаржылық міндеттемелерін ұлғайтатын кез келген түзету оны қабылдағаны туралы хабарлаған елдер үшін ғана міндетті болады.

18-бап

(1) Осы Конвенция Одақ жүйесін жетілдіруге бағытталған өзгерістер енгізу мақсатында қайта қаралуы мүмкін.

(2) Осы мақсатта Одақ елдерінің өкілдерінің конференциялары Одақ елдерінде кезекпен өткізіледі.

(3) 13-тен 17-ге дейінгі баптарға түзетулер енгізу 17-баптың ережелерімен реттеледі.

19-бап

Одақ елдері өнеркәсіптік меншікті қорғау жөнінде өзара жеке арнайы келісімдер жасасу құқығын сақтайтыны, егер бұл келісімдер осы Конвенцияның ережелеріне қайшы келмесе, түсінікті болып табылады.

20-бап

(1) (a) Осы Актіге қол қойған Одақтың әрбір елі оны ратификациялай алады немесе егер оған қол қоймаған болса, оған қосыла алады. Ратификациялау грамоталары мен қосылу туралы актілер Бас директорға сақтауға тапсырылады.

(b) Одақтың әрбір елі өзінің ратификациялау грамотасында немесе қосылу туралы актісінде ратификациялау немесе қосылу мынадай ережелерге қолданылмайтынын мәлімдей алады:

(i) 1-ден 12-ге дейінгі баптарға немесе

(ii) 13-тен 17-ге дейінгі баптарға.

(c) Осы тармақтың (b) тармақшасына сәйкес осы тармақшада көрсетілген екі баптар тобының бірін ратификациялау немесе қосылу аясына енгізбеген Одақтың әрбір елі кейіннен кез келген уақытта өзінің ратификациялауының немесе қосылуының қолданылуын осы баптар тобына да тарататынын мәлімдей алады. Мұндай мәлімдеме Бас директорға сақтауға тапсырылады.

(2) (a) 1-ден 12-ге дейінгі баптар ратификациялау грамоталарын немесе қосылу туралы актілерді сақтауға тапсырған және (1) (b) (i)-тармағында көзделген мәлімдеме жасамаған Одақтың алғашқы он еліне қатысты оныншы ратификациялау грамотасы немесе қосылу туралы акт сақтауға тапсырылғаннан кейін үш ай өткен соң күшіне енеді.

(b) 13-тен 17-ге дейінгі баптар ратификациялау грамоталарын немесе қосылу туралы актілерді сақтауға тапсырған және (1) (b) (ii)-тармағында көзделген мәлімдеме жасамаған Одақтың алғашқы он еліне қатысты оныншы ратификациялау грамотасы немесе қосылу туралы акт сақтауға тапсырылғаннан кейін үш ай өткен соң күшіне енеді.

(c) (1) (b) (i) және (ii)-тармақтарында көзделген баптардың екі тобының әрқайсысы (a) және (b) тармақшаларының ережелеріне сәйкес бастапқы күшіне енген жағдайда және (1) (b)-тармағының ережелерін сақтай отырып, 1-ден 17-ге дейінгі баптар (a) және (b) тармақшаларында көрсетілген елдерден басқа, ратификациялау грамотасын немесе қосылу туралы актіні сақтауға тапсырған Одақтың кез келген еліне, сондай-ақ (1) (c)-тармағына сәйкес мәлімдеме тапсырған Одақтың кез келген еліне қатысты Бас директор осындай құжаттың сақтауға тапсырылғаны туралы хабарлаған күннен бастап үш ай өткен соң күшіне енеді, егер тапсырылған грамота, акт немесе мәлімдемеде бұдан кешірек күн көрсетілмесе. Соңғы жағдайда осы Акт осындай елге қатысты солай көрсетілген күні күшіне енеді.

(3) Ратификациялау грамотасын немесе қосылу туралы актіні сақтауға тапсырған Одақтың кез келген еліне қатысты 18-ден 30-ға дейінгі баптар (1) (b)-тармағында көзделген баптар топтарының кез келгені осы елге қатысты (2) (a), (b) немесе (c)-тармақтарына сәйкес күшіне енетін күндердің неғұрлым ертерегінде күшіне енеді.

21-бап

(1) Одаққа мүше болып табылмайтын кез келген ел осы Актіге қосыла алады және осылайша Одақтың мүшесі бола алады. Қосылу туралы актілер Бас директорға сақтауға тапсырылады.

(2) (a) Осы Акт ережелерінің күшіне ену күніне дейін бір ай немесе одан да көп уақыт бұрын қосылу туралы актісін сақтауға тапсырған, Одаққа мүше болып табылмайтын кез келген елге қатысты осы Акт, егер қосылу туралы актіде бұдан кешірек күн көрсетілмесе, осы Акт ережелері 20-баптың (2) (a) немесе (b)-тармақтарына сәйкес бастапқыда күшіне енген күннен бастап күшіне енеді, алайда:

(i) егер 1-ден 12-ге дейінгі баптар осы күнге дейін күшіне енбесе, бұл ел аталған ережелер күшіне енгенге дейінгі кезеңде олардың орнына Лиссабон актісінің 1-ден 12-ге дейінгі баптарымен байланысты болады;

(ii) егер 13-тен 17-ге дейінгі баптар осы күнге дейін күшіне енбесе, бұл ел аталған ережелер күшіне енгенге дейінгі кезеңде олардың орнына Лиссабон актісінің 13 және 14-баптарының (3), (4) және (5)-тармақтарымен байланысты болады.

Егер қосылу туралы актіде ел бұдан кешірек күнді көрсетсе, осы Акт осы елге қатысты солай көрсетілген күні күшіне енеді.

(b) Қосылу туралы актісін осы Актінің қандай да бір баптар тобы күшіне енген күннен кейін немесе оған дейін бір айдан аз уақыт бұрын сақтауға тапсырған, Одаққа мүше болып табылмайтын кез келген елге қатысты осы Акт (a) тармақшасының ережелерін сақтай отырып, егер қосылу туралы актіде бұдан кешірек күн көрсетілмесе, Бас директор оның қосылғаны туралы хабарлаған күннен бастап үш ай өткен соң күшіне енеді. Соңғы жағдайда осы Акт осы елге қатысты солай көрсетілген күні күшіне енеді.

(3) Осы Акт толық көлемде күшіне енген күннен кейін немесе осы күнге дейін бір айдан аз уақыт бұрын қосылу туралы актісін сақтауға тапсырған, Одаққа мүше болып табылмайтын кез келген елге қатысты осы Акт, егер қосылу туралы актіде бұдан кешірек күн көрсетілмесе, Бас директор оның қосылғаны туралы хабарлаған күннен бастап үш ай өткен соң күшіне енеді. Соңғы жағдайда осы Акт осы елге қатысты солай көрсетілген күні күшіне енеді.

22-бап

20-баптың (1) (b)-тармағында және 28-баптың (2)-тармағында көзделген рұқсат етілген алып тастауларды қоспағанда, ратификациялау немесе қосылу осы Актіде белгіленген барлық ережелерді автоматты түрде тануға және оның барлық артықшылықтарын алуға әкеп соғады.

23-бап

Осы Акт толық көлемде күшіне енгеннен кейін ешбір ел осы Конвенцияның бұрынғы актілеріне қосыла алмайды.

24-бап

(1) Кез келген ел өзінің ратификациялау грамотасында немесе қосылу туралы актісінде не кез келген кейінгі уақытта Бас директорға жазбаша хабарлама жіберу арқылы осы Конвенцияның өзі өтініште немесе хабарламада көрсеткен, халықаралық қатынастары үшін жауапты болатын барлық немесе кейбір аумақтарға қолданылатынын мәлімдей алады.

(2) Осындай мәлімдеме жасаған немесе осындай хабарлама жіберген кез келген ел кез келген уақытта Бас директорға осы Конвенцияның аталған аумақтардың барлығына немесе кейбіріне қолданылуын тоқтататыны туралы хабарлай алады.

(3) (a) (1)-тармаққа сәйкес жасалған кез келген мәлімдеме осындай мәлімдемені қамтыған ратификациялау немесе қосылу құжаттары күшіне енген күннен бастап күшіне енеді, ал аталған тармаққа сәйкес жіберілген кез келген хабарлама Бас директор ол туралы хабарлағаннан кейін үш ай өткен соң күшіне енеді.

(b) (2)-тармаққа сәйкес жіберілген кез келген хабарлама Бас директор оны алғаннан кейін он екі ай өткен соң күшіне енеді.

25-бап

(1) Осы Конвенцияға қатысушы болып табылатын әрбір ел өзінің Конституциясына сәйкес осы Конвенцияның қолданылуын қамтамасыз ету үшін қажетті шараларды қабылдауға міндеттенеді.

(2) Әрбір ел ратификациялау грамотасын немесе қосылу туралы актіні сақтауға тапсырған сәтте өзінің ішкі заңнамасына сәйкес осы Конвенцияның ережелерін жүзеге асыруға қабілетті болуға тиіс деп түсініледі.

26-бап

(1) Осы Конвенция мерзімсіз қолданылады.

(2) Кез келген ел Бас директорға хабарлама жіберу арқылы осы Актінің күшін жоя алады. Мұндай күшін жою барлық алдыңғы Актілердің де күшін жою болып табылады және тек оны жүзеге асырған елге ғана қолданылады, ал Одақтың қалған елдеріне қатысты Конвенция күшінде қалады және орындалуға жатады.

(3) Күшін жою Бас директор хабарламаны алған күннен бастап бір жыл өткен соң күшіне енеді.

(4) Осы бапта көзделген күшін жою құқығын ешбір ел Одақтың мүшесі болған күннен бастап бес жыл өтпейінше пайдалана алмайды.

27-бап

(1) Осы Акт өзі қолданылатын елдер арасындағы қатынастарда және өзі қолданылатын көлемде 1883 жылғы 20 наурыздағы Париж конвенциясын және оны қайта қарау жөніндегі кейінгі Актілерді алмастырады.

(2) (a) Осы Акт қолданылмайтын немесе толық көлемде қолданылмайтын, бірақ 1958 жылғы 31 қазандағы Лиссабон актісі қолданылатын елдерге қатысты соңғысы толық көлемде немесе осы Актінің (1)-тармаққа сәйкес оны алмастырмайтын бөлігінде күшінде қалады.

(b) Сол сияқты осы Акт немесе оның қандай да бір бөлігі, сондай-ақ Лиссабон актісі қолданылмайтын елдерге қатысты 1934 жылғы 2 маусымдағы Лондон актісі толық көлемде немесе осы Актінің (1)-тармаққа сәйкес оны алмастырмайтын бөлігінде күшінде қалады.

(c) Сол сияқты осы Акт немесе оның қандай да бір бөлігі, Лиссабон актісі және Лондон актісі қолданылмайтын елдерге қатысты 1925 жылғы 6 қарашадағы Гаага актісі толық көлемде немесе осы Актінің (1)-тармаққа сәйкес оны алмастырмайтын бөлігінде күшінде қалады.

(3) Осы Актіге қосылатын, Одаққа мүше болып табылмайтын елдер оны осы Актінің тарапы болып табылмайтын немесе осы Актінің тарапы бола отырып, 20-баптың (1) (b) (i)-тармағында көзделген мәлімдеме жасаған кез келген Одақ елімен қарым-қатынастарында қолданады. Мұндай елдер аталған Одақ елінің өздерімен қарым-қатынастарында өзі қатысушысы болып табылатын ең соңғы алдыңғы Актінің ережелерін қолдана алатынын мойындайды.

28-бап

(1) Одақтың екі немесе одан да көп елдері арасында осы Конвенцияны түсіндіруге немесе қолдануға қатысты туындаған және келіссөздер арқылы шешілмеген кез келген дау, егер аталған елдер дауды реттеудің басқа тәсілі туралы уағдаласпаса, аталған елдердің кез келгені тарапынан Сот Статутына сәйкес өтініш беру арқылы Халықаралық сотқа берілуі мүмкін. Өтініш беретін ел Халықаралық бюроға Соттың қарауына берілген дау туралы хабарлауға тиіс; Халықаралық бюро бұл туралы Одақтың қалған елдерін хабардар етеді.

(2) Осы Актіге қол қою кезінде немесе ратификациялау грамотасын не қосылу туралы актіні сақтауға тапсыру кезінде кез келген ел өзінің (1)-тармақтың ережелерімен байланысты деп есептемейтінін мәлімдей алады. Мұндай ел мен Одақтың басқа елдері арасындағы дауларға қатысты (1)-тармақтың ережелері қолданылмайды.

(3) (2)-тармақтың ережелеріне сәйкес мәлімдеме жасаған кез келген ел Бас директорға хабарлама жіберу арқылы оны кез келген уақытта кері қайтарып ала алады.

29-бап

(1) (a) Осы Акті француз тілінде бір данада қол қойылады және Швеция Үкіметіне сақтауға тапсырылады.

(b) Ресми мәтіндерді Бас директор мүдделі үкіметтермен консультациялар өткізгеннен кейін ағылшын, испан, итальян, неміс, португал және орыс тілдерінде, сондай-ақ Ассамблея айқындайтын басқа тілдерде әзірлейді.

(c) Әртүрлі мәтіндерді түсіндіруде келіспеушіліктер туындаған жағдайда француз тіліндегі мәтінге басымдық беріледі.

(2) Осы Актіге Стокгольмде 1968 жылғы 13 қаңтарға дейін қол қоюға болады.

(3) Бас директор осы Актінің Швеция Үкіметі тиісті түрде куәландырған қол қойылған мәтінінің екі данасын Одақтың барлық елдерінің үкіметтеріне және сұрау салған жағдайда кез келген басқа елдің үкіметіне жібереді.

(4) Бас директор осы Актіні Біріккен Ұлттар Ұйымының Хатшылығында тіркейді.

(5) Бас директор Одақтың барлық елдерінің үкіметтерін қол қоюлар, ратификациялау грамоталары мен қосылу туралы актілерді сақтауға тапсыру, осы құжаттарда қамтылған немесе 20-баптың (1) (c)-тармағына сәйкес жасалған мәлімдемелер, осы Актінің кез келген ережелерінің күшіне енуі, күшін жою туралы хабарламалар және 24-бапқа сәйкес жіберілген хабарламалар туралы хабардар етеді.

30-бап

(1) Бірінші Бас директор қызметіне кіріскенге дейін осы Актіде Ұйымның Халықаралық бюросына немесе Бас директорға жасалған сілтемелер тиісінше Одақ бюросына немесе оның Директорына жасалған сілтемелер болып есептеледі.

(2) 13-тен 17-ге дейінгі баптармен байланысты емес Одақ елдері, егер қаласа, Ұйымды құру туралы Конвенция күшіне енгеннен кейін бес жыл ішінде осы Актінің 13-тен 17-ге дейінгі баптарынан туындайтын құқықтарды, осы баптармен байланысты болғандай, пайдалана алады. Мұндай құқықтарды пайдаланғысы келетін кез келген ел осы мақсатта Бас директорға жазбаша хабарлама жібереді, ол хабарламаны алған күннен бастап күшіне енеді. Мұндай елдер көрсетілген мерзім аяқталғанға дейін Ассамблея мүшелері болып есептеледі.

(3) Одақтың барлық елдері Ұйымға мүше болғанға дейін Ұйымның Халықаралық бюросы Одақ бюросы ретінде де жұмыс істейді, ал Бас директор осы Бюроның Директоры ретінде де әрекет етеді.

(4) Одақтың барлық елдері Ұйымға мүше болған сәттен бастап Одақ бюросының құқықтары, міндеттері мен мүлкі Ұйымның Халықаралық бюросына өтеді.

Конституция Заң Кодекс Нормативтік акт Жарлық Бұйрық Шешім Қаулы Адвокат Алматы заңгері Заңгерлік қызмет Заңгерлік кеңес Азаматтық Қылмыстық Әкімшілік істер мен даулар Қорғау Төрелік Қазақстанның заң компаниясы Адвокаттық кеңсе Сот істері Декларация Жарлық Бұйрық Қаулы Шешім Баяндама Қорытынды Өтініш Қорытынды Конвенция Шарт Меморандум Әдістеме Нормалар Нота Қағидалар Бағдарлама Жарғы Хартия Бап Түсініктеме Резолюция Регламент Хаттама Жоба Бағдарлама Қағидалар Жолдаулар