Қызметтер үшін төлем тек компанияның шотына төленеді. Сізге ыңғайлы болу үшін біз Kaspi RED / CREDIT /БӨЛІП ТӨЛЕУДІ іске қостық 😎

Басты бет / Конвенция / Резолюция / Концепция / Тәуелсіз Мемлекеттер Достастығына қатысушы мемлекеттердің келісілген шекара саясатының тұжырымдамасы туралы шешім

Тәуелсіз Мемлекеттер Достастығына қатысушы мемлекеттердің келісілген шекара саясатының тұжырымдамасы туралы шешім

АMANAT партиясы және Заң және Құқық адвокаттық кеңсесінің серіктестігі аясында елге тегін заң көмегі көрсетілді

Тәуелсіз Мемлекеттер Достастығына қатысушы мемлекеттердің келісілген шекара саясатының тұжырымдамасы туралы шешім

Тәуелсіз Мемлекеттер Достастығы Мемлекет басшылары кеңесінің 2005 жылғы 26 тамыздағы шешімі

Тәуелсіз Мемлекеттер Достастығы Мемлекет басшыларының кеңесі

шешті:

  1. Тәуелсіз Мемлекеттер Достастығына қатысушы мемлекеттердің келісілген шекара саясатының тұжырымдамасы (қоса беріледі) бекітілсін.
  2. Шекара әскерлері қолбасшыларының кеңесіне осы Шешімге қол қойған мемлекеттердің мүдделі органдарымен және Тәуелсіз Мемлекеттер Достастығы органдарымен бірлесіп, аталған Тұжырымдаманы іске асыру жөніндегі тиісті ұсыныстарды дайындау және белгіленген тәртіппен енгізу тапсырылсын.
  3. Осы Шешім қол қойылған күнінен бастап күшіне енеді, ал заңнамасында оның күшіне енуі үшін қажетті мемлекетішілік рәсімдерді орындау талап етілетін мемлекеттер үшін – аталған рәсімдердің орындалғаны туралы хабарламаны депозитарийге сақтауға тапсырған күннен бастап күшіне енеді.

2005 жылғы 26 тамызда Қазан қаласында орыс тілінде бір түпнұсқа данада жасалды. Түпнұсқа Тәуелсіз Мемлекеттер Достастығының Атқарушы комитетінде сақталады, ол осы Шешімге қол қойған әрбір мемлекетке оның куәландырылған көшірмесін жібереді.

Әзербайжан Республикасы үшін                  Молдова Республикасы үшін

Армения Республикасы үшін                     Ресей Федерациясы үшін

Беларусь Республикасы үшін                    Тәжікстан Республикасы үшін

Грузия үшін                                   Түрікменстан үшін

Қазақстан Республикасы үшін                  Өзбекстан Республикасы үшін

Қырғыз Республикасы үшін                     Украина үшін

БЕКІТІЛГЕН

Тәуелсіз Мемлекеттер Достастығы Мемлекет басшылары кеңесінің

2005 жылғы 26 тамыздағы

Тәуелсіз Мемлекеттер Достастығына қатысушы мемлекеттердің келісілген шекара саясатының тұжырымдамасы туралы шешімімен

ТӘУЕЛСІЗ МЕМЛЕКЕТТЕР ДОСТАСТЫҒЫНА ҚАТЫСУШЫ МЕМЛЕКЕТТЕРДІҢ КЕЛІСІЛГЕН ШЕКАРА САЯСАТЫНЫҢ ТҰЖЫРЫМДАМАСЫ

Тәуелсіз Мемлекеттер Достастығына қатысушы мемлекеттер төмендегілерді ескере отырып, Тәуелсіз Мемлекеттер Достастығына қатысушы мемлекеттердің келісілген шекара саясатының осы Тұжырымдамасын (бұдан әрі – Тұжырымдама) қабылдайды:

қалыптасқан геосаяси шындық ТМД-ға қатысушы мемлекеттердің ұлттық мүдделерін экономикалық, саяси, әлеуметтік, халықаралық, ақпараттық, әскери, шекаралық және Тұжырымдаманы қабылдаған ТМД-ға қатысушы мемлекеттердің (бұдан әрі – қатысушы мемлекеттер) қауіпсіздігін қамтамасыз етудің өзге де салаларында қорғау жөніндегі күш-жігерін тығыз біріктіру қажеттігін туындатады;

қатысушы мемлекеттердің мемлекеттік шекараларында олардың ұлттық қауіпсіздігінің негізін құрайтын мемлекеттік және мемлекетаралық мүдделерінің ауқымды жиынтығы шоғырланған, ал оны қамтамасыз ету негізгі проблемаларды ұжымдық шешу тетіктеріне негізделеді;

қатысушы мемлекеттер үшін орнықты әрі сенімді мемлекеттік шекаралардың болуы өмірлік маңызы бар мәселе болып табылады, оларды қорғау және күзету қатысушы мемлекеттердің ұлттық қауіпсіздігіне кепілдік беретін басты шарт болып табылады;

шекара саласындағы бірлескен қызмет шекара қауіпсіздігін қамтамасыз етуге бағытталған мемлекеттік билік институттарының келісілген (үйлестірілген) жұмысы туралы қатысушы мемлекеттер қабылдаған көзқарастар жүйесі негізінде жүзеге асырылады.

I. Жалпы ережелер

Тұжырымдама қауіпсіздікті қамтамасыз етудің негізгі бағыттары, сондай-ақ шекара саласындағы ұлттық мүдделерді іске асыру, шекаралық ынтымақтастықты дамыту және тереңдету жөніндегі ресми түрде қабылданған көзқарастар жүйесін білдіреді.

Келісілген шекара саясатын айқындай отырып, қатысушы мемлекеттер БҰҰ Жарғысына, ЕҚЫҰ қағидаттарына, шекаралардың мызғымастығына қатысты Хельсинки Қорытынды актісінің ережелеріне, сондай-ақ ТМД-ның шекара саласындағы негізгі құжаттарына өздерінің адалдығын растайды.

Қатысушы мемлекеттердің сыртқы және ішкі саясатының бір бөлігі болып табылатын келісілген шекара саясаты шекара қауіпсіздігін қамтамасыз етудің, қатысушы мемлекеттердің егемендігі мен аумақтық тұтастығына қол сұғушылықтардың алдын алу мен жолын кесудің, олардың мемлекеттік шекараларын күзету мен қорғаудың тұтас жүйесін құруға бағытталған.

Келісілген шекара саясатының стратегиялық мақсаты шекара кеңістіктерінде қатысушы мемлекеттердің ортақ және ұлттық мүдделерін қорғау, жеке адамның, қоғамның және мемлекеттің қауіпсіздігін қамтамасыз ету болып табылады.

Келісілген шекара саясатының стратегиялық мақсатын іске асыру кезіндегі басты басымдықтар мыналар болып табылады:

қатысушы мемлекеттердің сенімді қауіпсіздігін қамтамасыз ету, олардың егемендігі мен аумақтық тұтастығын сақтау және нығайту саласындағы ынтымақтастық;

қатысушы мемлекеттердің шекара кеңістіктеріндегі әскери қауіптің, дағдарыстар мен жанжалдардың алдын алу жөніндегі халықаралық шарттарға сәйкес бірлескен шаралар қабылдау;

терроризмге және экстремизмнің өзге де көріністеріне, ұйымдасқан қылмысқа, заңсыз көші-қонға, есірткі мен прекурсорлардың заңсыз айналымына, сондай-ақ қауіпсіздікке төнетін өзге де қазіргі заманғы сын-қатерлер мен қауіптерге бірлесіп қарсы іс-қимыл жасау;

ұлттық қауіпсіздікті қамтамасыз етудің аса маңызды шарты ретінде шекара маңындағы аумақтардың әлеуметтік-экономикалық өрлеуіне, халықтың әл-ауқатының өсуіне және рухани дамуына қолайлы жағдайлар жасау;

мемлекеттер арасындағы достық қатынастарды нығайтуға ықпал ететін мемлекеттік шекаралар мен шекара маңындағы аумақтарда саяси, дипломатиялық, арнайы және өзге де акцияларды өткізу саласындағы ынтымақтастық.

Шекара қауіпсіздігін қамтамасыз етудің құрылымдық және функционалдық құрамдас бөліктерінің бірі қатысушы мемлекеттердің шекара ведомстволары болып табылады. Бұл ретте оларға шекара қауіпсіздігі міндеттерінің белгілі бір бөлігін тікелей іске асыру, сондай-ақ қатысушы мемлекеттердің мемлекеттік шекараларында шоғырланған және олардың шекара кеңістіктерінде көрініс табатын мүдделерін қорғау жүктеледі.

Келісілген шекара саясаты мемлекеттік шекараларда көршілес мемлекеттермен тату көршілік қатынастарды орнату және қолдау, шекара маңындағы аумақтарда өзара тиімді экономикалық және өзге де ынтымақтастықты дамыту, адамның негізгі құқықтары мен бостандықтарын қамтамасыз ету, жеке адамның, қоғамның және әрбір қатысушы мемлекеттің мүдделерін қорғау мүдделерін қамтамасыз етуге бағытталған.

Қатысушы мемлекеттердің шекара саласындағы мүдделерін қорғау саяси, дипломатиялық, жедел, әскери, режимдік, құқықтық, әкімшілік, қаржылық, шекаралық, құқық қорғау, әлеуметтік және өзге де шаралар кешенін жүзеге асыруды көздейді, оның ішінде:

мемлекеттік шекараларды халықаралық-құқықтық тұрғыдан ресімдеу және олардың қол сұғылмауын қамтамасыз ету;

қатысушы мемлекеттердің мүдделеріне төнуі мүмкін қауіптерді болжау, олардың уақтылы анықталуын, қадағалануын және өршуінің жолын кесуді қамтамасыз ету, шекара саясаты субъектілеріне объективті ақпаратты жедел жеткізу;

мемлекеттік шекараларда және шекара кеңістіктерінде барлық жеке және заңды тұлғалардың қатысушы мемлекеттердің мүдделеріне сәйкес заңдарда белгіленген режимдік нормаларды, қағидаларды, талаптарды және қабылданған міндеттемелерді сақтауын бақылау.

Қатысушы мемлекеттердің келісілген шекара саясаты олардың мемлекеттік шекараларын, мемлекеттік шекаралар арқылы өткізу пункттерін және мемлекеттердің ішіндегі олармен байланысты объектілерді, ұлттық заңнамада айқындалатын шекара маңындағы аумақтарды, трансшекаралық (шекаралық) су объектілерін, ішкі сулар мен аумақтық теңіздің акваторияларын, әуе кеңістігін, су асты ортасын, континенттік қайраңды және айрықша экономикалық аймақты қамтитын шекара кеңістіктерінде жүзеге асырылады.

Келісілген шекара саясатының объектілері қатысушы мемлекеттердің өздерінің шекара кеңістігіндегі ұлттық мүдделері болып табылады.

Қатысушы мемлекеттердің келісілген шекара саясатының субъектілері олардың мемлекеттік билік және жергілікті өзін-өзі басқару органдары, қоғамдық бірлестіктері, ұйымдары және жекелеген азаматтары болып табылады.

Осы Тұжырымдаманың құқықтық негізін халықаралық құқықтың жалпыға бірдей танылған қағидаттары мен нормалары, қатысушы мемлекеттер шекара саласында жасасқан халықаралық шарттар және олардың ұлттық заңнамасы құрайды.

II. Келісілген шекара саясатының негізгі қағидаттары, міндеттері мен бағыттары

Қатысушы мемлекеттердің келісілген шекара саясатының негізгі қағидаттары мыналар болып табылады:

қатысушы мемлекеттердің егемендігін, теңдігін және аумақтық тұтастығын өзара құрметтеу;

мемлекеттік шекаралардың мызғымастығы және даулы шекара мәселелерін бейбіт жолмен шешу;

қатысушы мемлекеттердің мемлекеттік шекараларын қорғау және күзету саласындағы жан-жақты ынтымақтастық;

адам мен азаматтың құқықтары мен бостандықтарын құрметтеу;

мемлекеттік шекараларды күзету мәселелерінде бірлескен шешімдердің маңыздылығын, қатысушы мемлекеттердің шекара кеңістіктеріндегі мемлекеттік мүдделерін іске асыру мен қорғауға кешенді көзқарасты тану.

Қатысушы мемлекеттердің келісілген шекара саясатының негізгі міндеттері мыналар болып табылады:

халықаралық шарттар мен ұлттық заңнама негізінде қатысушы мемлекеттердің мемлекеттік шекаралары мен шекара маңындағы аумақтарында олардың мүдделері мен қауіпсіздігін қамтамасыз ету;

шекара қауіпсіздігін қамтамасыз ету саласындағы ұлттық заңнаманы үйлестіру және біріздендіру;

шекара кеңістіктеріндегі әскери қауіптің, дағдарыстар мен жанжалдардың алдын алу жөніндегі мемлекетаралық ынтымақтастықты жүзеге асыру;

аумақтық тұтастық пен ұлттық егемендікті қамтамасыз ету;

мемлекеттік шекараларды күзетудегі өзара іс-қимылды жетілдіру, оның ішінде қатысушы мемлекеттердің мемлекеттік шекараларының шектес учаскелерін күзетуге тартылатын шекара ведомстволарының, қарулы күштердің және басқа да әскери құралымдардың шекаралық (өңірлік) басқармаларының, әскер топтары мен құрамаларының бірлескен командалық-штабтық және тактикалық оқу-жаттығуларын өткізу;

терроризмнің және экстремизмнің өзге де көріністерінің жолын кесу;

мемлекеттік шекараларда трансшекаралық ұйымдасқан қылмыстық топтардың әрекеттерінің, заңсыз көші-қонның, контрабандалық қызметтің және есірткі мен прекурсорлардың, қарудың, оқ-дәрілердің, жарылғыш, улы, психотроптық, радиоактивті заттардың, қорғаныстық және стратегиялық маңызы бар өнімдердің, оның ішінде жаппай қырып-жою қаруы мен оның құрамдас бөліктерінің шекара арқылы заңсыз өткізілуінің жолын кесу, сондай-ақ қатысушы мемлекеттердің аумақтарында құқыққа қайшы әрекеттерді болдырмайтын жағдайлар жасау;

қатысушы мемлекеттердің сыртқы шекараларында үшінші елдердің арнаулы қызметтерінің барлау-диверсиялық қызметіне қарсы іс-қимыл жасау жөніндегі кешенді іс-шараларды әзірлеу және жүзеге асыру;

жекелеген қатысушы мемлекеттерді белгілі бір шет мемлекеттер мен әскери-саяси блоктар тарапынан халықаралық оқшаулауға бағытталған әрекеттердің алдын алу;

қатысушы мемлекеттердің мемлекеттік шекараларының қауіпсіздігі, шекара кеңістіктеріндегі аумақтарды санитариялық қорғау мәселелері бойынша мемлекетаралық нысаналы, оның ішінде ғылыми-техникалық бағдарламаларды әзірлеу, іске асыру және үйлестіру, сондай-ақ олардың тиімділігін бағалау;

шекара мәселелеріне қатысты заңнамалық және өзге де нормативтік құқықтық актілерді қабылдаудың әскери-саяси және әлеуметтік-экономикалық салдарларын кешенді бағалау, сондай-ақ оларды іске асыру нәтижелерін талдау;

апаттар мен табиғи зілзалалардың салдарын жою кезінде шекара маңындағы аумақтардың халқына көмек көрсету;

қатысушы мемлекеттердің шекара қауіпсіздігі мәселелері бойынша ақпаратты жинақтау, талдау және өңдеу, ішкі және сыртқы қауіптерді бағалау және мемлекеттік шекаралардағы қауіп көздерін анықтау, осы жұмысты жетілдіру жөнінде ұсынымдар әзірлеу;

шекара ведомстволарын құру және олардың мәртебесі, шекара әскерлерін материалдық-техникалық құралдармен және арнайы техникамен қамтамасыз ету, қатысушы мемлекеттердің әскерлері мен әскери кадрларын даярлау, сондай-ақ осы және қатысушы мемлекеттердің мемлекеттік шекараларындағы шекара әскерлерінің қызметіне байланысты бірқатар өзге де мәселелерге қатысты халықаралық шарттардың жобаларын әзірлеу мәселелері бойынша консультациялар мен ғылыми-практикалық конференциялар ұйымдастыру және өткізу.

Қатысушы мемлекеттердің келісілген шекара саясатының негізгі бағыттары мыналар болып табылады:

а) қатысушы мемлекеттердің шекара қауіпсіздігін қамтамасыз ету, атап айтқанда:

билік органдарының, шекара маңындағы аумақтардағы жекелеген азаматтардың қызметін реттейтін, сондай-ақ осы саладағы бұзушылықтар мен келтірілген залал үшін жауаптылықты белгілейтін нормативтік құқықтық базаны құру және жетілдіру;

мемлекеттік нысаналы және кешенді бағдарламаларды әзірлеу мен іске асыру негізінде шекара қауіпсіздігін қамтамасыз ету жүйесін басым тәртіппен дамыту;

мемлекеттік шекаралардағы және шекара маңындағы аумақтардағы ахуалдың дамуын уақтылы болжау, мемлекеттік билік және басқару органдарының, қоғамдық және өзге де ұйымдардың мемлекеттік шекараларды күзету және олардағы тұрақты жағдайды қамтамасыз ету мүддесіндегі өзара іс-қимылын ұйымдастыру және жетілдіру, қазіргі заманғы сын-қатерлер мен қауіптерді ескере отырып, шекара маңындағы аумақтар халқының мүдделерін кешенді қорғау жүйесін іске асырудың және қатысушы мемлекеттердің мемлекеттік шекараларының қауіпсіздігін қамтамасыз етудің жаңа тәсілдерін қалыптастыру;

б) шекара маңындағы аумақтарды әлеуметтік-экономикалық дамыту, олардың халқының әл-ауқатын арттыру қоғамдық және саяси тұрақтылықты қолдаудың аса маңызды факторлары болып табылады, оның ішінде:

негізгі әлеуметтік игіліктердің (медициналық қызмет көрсетудің, зейнетақымен қамсыздандырудың, жалпы білім берудің және т.б.) жалпыға бірдей қолжетімділігі мен қоғам үшін қолайлы сапасын қамтамасыз етуге қажетті жағдайлар жасауға қатысу;

осы аумақтардың стратегиялық ресурстарына мемлекеттік бақылауды қамтамасыз ету;

көші-қон ағындарын реттеу жөніндегі шаралар кешеніне қатысу;

халықты кемсітудің кез келген нысандарына қарсы іс-қимыл жасау;

төтенше жағдайлардың алдын алу үшін жағдайлар жасау, ал олар туындаған жағдайда – халықты қорғау және салдарын жою жөніндегі қажетті шараларды қамтамасыз ету;

в) қатысушы мемлекеттердің мемлекеттік шекараларын егемендік пен олардың аумақтық тұтастығын өзара құрметтеу, шекара мәселелерін бейбіт және күш қолданбай шешу қағидаттары негізінде халықаралық-құқықтық тұрғыдан ресімдеу;

г) қатысушы мемлекеттердің басқа мемлекеттермен мемлекеттік шекараларындағы ұлттық және ұжымдық қауіпсіздігін қамтамасыз ету;

д) қатысушы мемлекеттердің барлық деңгейлерде шекаралық ынтымақтастықты дамытуы, ол мемлекеттік шекараларды күзету міндеттерін шешу кезінде қызметті үйлестіру мен өзара іс-қимылды дәйекті түрде тереңдетуге бағытталған және мыналарды көздейді:

халықаралық құқықтың нормалары мен қағидаттары негізінде қатысушы мемлекеттердің әрқайсысының мүдделерін сақтауды қамтамасыз ететін шекаралық ынтымақтастықтың халықаралық нормативтік-құқықтық базасын қалыптастыру;

ең алдымен, қатысушы мемлекеттердің басқа мемлекеттермен мемлекеттік шекараларында шекара қауіпсіздігінің тұтас жүйесін құру, бұл мақсатта барлық мүдделі тараптардың күш-жігерін біріктіру;

терроризмге және экстремизмнің өзге де көріністеріне, ұйымдасқан қылмысқа, заңсыз көші-қонға, есірткі мен прекурсорлардың заңсыз айналымына және қауіпсіздікке төнетін өзге де қазіргі заманғы сын-қатерлер мен қауіптерге бірлесіп қарсы іс-қимыл жасау, сондай-ақ табиғи және техногендік сипаттағы төтенше жағдайлардың алдын алу проблемаларын шешу кезінде іс-қимылдарды үйлестіру;

е) әрбір қатысушы мемлекеттің ұлттық мүдделерін де, барлық қатысушы мемлекеттердің шекара қауіпсіздігін де қорғауға байланысты проблемаларды іргелі теориялық тұрғыдан пысықтауды және кешенді шешуді қамтамасыз ететін шекара саясаты саласындағы ғылыми білім жүйесін қалыптастыру және дамыту.

Осы саладағы зерттеулердің басым міндеттері мыналар болып табылады:

қатысушы мемлекеттердің ұлттық мүдделерін қорғауға геосаяси фактордың ықпалын ескеру;

шекара қауіпсіздігінің саяси, әлеуметтік-экономикалық, әскери-техникалық, әдіснамалық және өзге де аспектілерін әзірлеу;

қолданыстағы шекара проблемаларын бейбіт жолмен шешудің тетіктері мен жолдарын әзірлеу.

III. Қатысушы мемлекеттердің келісілген шекара саясаты саласындағы өзара міндеттемелері

Қатысушы мемлекеттердің ұлттық қауіпсіздік стратегиясы мен саясатындағы әріптестік басымдығы ұлттық мүдделерге жасалатын кез келген қол сұғушылықтарға барабар тойтарыс беруге және олардың жолын кесуге қажетті дайындықты қолдауға мүмкіндік береді.

Өзара міндеттемелер саласындағы шекаралық ынтымақтастықты одан әрі дамыту мыналарды көздейді:

мемлекеттік шекараларда қатысушы мемлекеттердің ұлттық және ұжымдық қауіпсіздігін қамтамасыз ету;

қатысушы мемлекеттердің нормативтік-құқықтық базасын жақындастыру;

көршілес мемлекеттермен іскерлік тату көршілік қатынастарды дамытуға жәрдемдесу;

қатысушы мемлекеттердің мемлекеттік шекаралары арқылы өткізу пункттеріндегі құқықтық режимдерді жетілдіру;

терроризмге және экстремизмнің өзге де көріністеріне, ұйымдасқан қылмысқа, заңсыз көші-қонға, есірткі мен прекурсорлардың заңсыз айналымына және қауіпсіздікке төнетін өзге де қазіргі заманғы сын-қатерлер мен қауіптерге бірлесіп қарсы іс-қимыл жасауға қатысатын мемлекеттік құрылымдардың ынтымақтастық нысандары мен әдістерін жетілдіру;

экологиялық және гуманитарлық проблемаларды шешуге, табиғи және техногендік сипаттағы төтенше жағдайлардың алдын алуға жәрдемдесу және өзара көмек көрсету;

шекара саласындағы қауіпсіздікті қамтамасыз етудің материалдық-техникалық базасын жетілдіруде өзара ынтымақтастық жасау.

IV. Тұжырымдама ережелерін материалдық-техникалық және қаржылық қамтамасыз ету

Осы Тұжырымдама ережелерін, сондай-ақ оны іске асыру жөніндегі нысаналы бағдарламалар мен бірлескен іс-шараларды материалдық-техникалық және қаржылық қамтамасыз ету қатысушы мемлекеттер айқындайтын тәртіппен және шарттарда жүзеге асырылады.

V. Тұжырымдама ережелерін іске асыру тетігі

Осы Тұжырымдама ережелерін іске асыру тетігі мыналарды көздейді:

ұжымдық және ұлттық қауіпсіздікті қамтамасыз ету, шекара саясаты және қатысушы мемлекеттердің шекаралық және өзге де ведомстволарының ынтымақтастығы мәселелері бойынша келісілген тәсілдерді әзірлеу;

қатысушы мемлекеттердің мемлекеттік шекараларында шекара қауіпсіздігін қамтамасыз ету жүйелерін қалыптастыру жөніндегі нысаналы мемлекеттік (мемлекетаралық) кешенді бағдарламаларды әзірлеу;

ТМД шеңберінде жасалған шекара мәселелері жөніндегі халықаралық шарттардың, мемлекетаралық бағдарламалардың ережелерін орындау;

материалдық-техникалық қамтамасыз ету саласындағы ынтымақтастықты жетілдіру жөнінде ұсыныстар әзірлеу;

қатысушы мемлекеттердің шекара ведомстволары арасындағы достық байланыстарды, олардың мәдениет, спорт және ардагерлер қозғалысы саласындағы ынтымақтастығын нығайту және дамыту.

Осы Тұжырымдама шеңберінде қабылданған шешімдердің орындалуын бақылау қатысушы мемлекеттердің ұлттық деңгейінде жүзеге асырылады.

Осы Тұжырымдаманың орындалу барысын талдау және Тәуелсіз Мемлекеттер Достастығы Мемлекет басшылары кеңесі мен Үкімет басшылары кеңесіне ақпарат дайындау қатысушы мемлекеттер, сондай-ақ Достастық органдары ұсынатын ақпарат негізінде Шекара әскерлері қолбасшыларының кеңесімен ТМД Атқарушы комитеті бірлесіп жүзеге асырады.

Жағдайдың дамуына қарай осы Тұжырымдамаға өзгерістер мен толықтырулар енгізілуі мүмкін.

Бастапқы мәтіндегі гиперсілтемелер:

Конституция, Заң Кодекс Нормативтік акт, Жарлық Бұйрық Шешім Қаулы Адвокат Алматы заңгері Заң қызметі Азаматтық Қылмыстық Әкімшілік істер, даулар Қорғау Арбитраждық Қазақстандағы заң компаниясы Адвокаттық кеңсе Сот істері Декларация Жарлық Бұйрық Қаулы Шешім Баяндама Қорытынды Өтініш Қорытынды Конвенция Шарт Меморандум Нота Ереже Бағдарлама Жарғы Хартия Бап Түсініктеме Резолюция Регламент Хаттама Жоба Бағдарлама Ережелер Жолдаулар