141-бапқа түсініктемелер. Борышкерге сот бұйрығының көшірмесін жіберу. Қазақстан Республикасы Азаматтық іс жүргізу кодексінің сот бұйрығына қарсылықтар

1. Сот бұйрығы шығарылғаннан кейінгі келесі күннен кешіктірілмей оны алуды тіркеуді қамтамасыз ететін байланыс құралдарын пайдалана отырып, борышкерге табыс етілуге немесе жіберілуге тиіс.

2. Борышкер сот бұйрығының көшірмесін алған күннен бастап немесе оны шығару туралы өзіне белгілі болған күннен бастап он жұмыс күні ішінде сот бұйрығын шығарған сотқа мәлімделген талапқа қарсылық жіберуге құқылы.

3. Борышкердің қарсылықтары сот бұйрығын беру туралы өтініште көрсетілген дау нысанасының бар екендігі туралы тиісті дәлелдемелермен расталуы керек. Электрондық құжат нысанында берілетін қарсылықтарға құжаттардың электрондық көшірмелері қоса беріледі.

4. Қарсылықтарға осы баптың екінші бөлігінде көрсетілген тұлға немесе оның өкілі қол қояды. Қарсылықтар электрондық құжат нысанында берілген кезде олар борышкердің немесе оның өкілінің электрондық цифрлық қолтаңбасымен куәландырылады. Өкіл беретін қарсылықтарға оның өкілеттігін куәландыратын сенімхат қоса берілуге тиіс.

5. Осы баптың үшінші және төртінші бөліктерінің талаптарына сәйкес келмейтін қарсылықтар сот ұйғарымымен қайтарылады.6. Дәлелді себептермен өткізіп алған қарсылық беру мерзімін сот бұйрығын шығарған сот осы Кодекстің 126-бабында көзделген негіздер бойынша және тәртіппен қалпына келтіре алады.

1. Түсініктеме берілген нормада борышкерге сот бұйрығының көшірмесін жіберу және борышкердің сот бұйрығына қарсылықтарын жіберу туралы ережелер көзделген. Сот борышкерге сот бұйрығын ол шығарылғаннан кейінгі келесі күннен кешіктірмей беруге немесе жіберуге міндетті. АІЖК-нің 123-бабының төртінші бөлігін ескере отырып, келесі күн жұмыс істемейтін күнге (демалыс немесе мереке күні) келетін жағдайда, сот бұйрығы борышкерге одан кейінгі бірінші жұмыс күні жіберілетіні немесе тапсырылатыны анық. Жіберу немесе тапсыру кезінде борышкердің оны алғанын тіркеуді қамтамасыз ететін байланыс құралдары пайдаланылуы тиіс (АІЖК-нің 127-бабына түсініктемені қараңыз).

2. Борышкердің өндіріп алушы мәлімдеген талапқа қарсылық білдіруге құқығы бар. Бұл құқық сот бұйрығының көшірмесін алған күннен бастап немесе оны шығару туралы белгілі болған күннен бастап есептелетін он жұмыс күні ішінде іске асырылуы мүмкін. Егер осы норманың бірінші бөлігінің талаптарына қайшы борышкердің сот бұйрығының көшірмесін алуы тіркелмесе, екінші шарт қолданылады.

3. Қарсылықтар сот бұйрығын шығару туралы өтініште көрсетілген дау нысанасының бар екендігі туралы тиісті дәлелдемелермен расталуы керек. Яғни, ол өндіріп алушы мәлімдеген талап бойынша даудың бар екендігін растайтын құжаттарды қарсылықтарға қоса беруі тиіс. Егер қарсылықтар электрондық құжат нысанында берілсе, онда тиісінше құжаттардың электрондық көшірмелері қоса беріледі.

4. Қарсылықтарға борышкер немесе оның өкілі қол қояды. Соңғы жағдайда қарсылықтарға оның өкілеттігін куәландыратын сенімхат қоса берілуге тиіс. Бұл ретте қарсылықтарға қол қою жөніндегі өкілдің өкілеттігіне сенімхатта арнайы нұсқау талап етілмейді.

5. Егер қарсылықтар осы баптың үшінші және төртінші бөліктерінде белгіленген талаптарға сәйкес келмесе, олар судьяның ұйғарымымен қайтарылады.

6. Егер судья оны өткізіп алу себептерін дәлелді деп тапса, қарсылық беруге өткізіп алған мерзім қалпына келтірілуі мүмкін. Осы іс жүргізу мерзімін қалпына келтірудің негіздері мен тәртібі АІЖК-нің 126-бабымен регламенттелген. Көрсетілген нормаға сәйкес борышкер, егер ол сотқа он жұмыс күнінен астам мерзімде, бірақ оны шығару туралы белгілі болған бір айдан кешіктірмей қарсылық жолдаған болса, өткізіп алған мерзімін қалпына келтіру туралы өтініш береді. Бұл ретте мерзімді қалпына келтіру туралы өтінішпен бір мезгілде сот бұйрығына қарсылықтар беріледі. Өтінішке мерзімді өткізіп алу себептерінің дәлелді екендігін растайтын құжат қоса беріледі.

ҚАЗАҚСТАН РЕСПУБЛИКАСЫ ЖОҒАРҒЫ СОТЫНЫҢ КІТАПХАНАСЫ

Астана, 2016 жыл

УДК 347 (574)  

К 63

ISBN 978-601-236-042-4

 Конституция Заң Кодекс Норматив Жарлық Бұйрық Шешім Қаулы Адвокат Алматы Заңгер Қорғаушы Заң қызметі Құқық қорғау Құқықтық қөмек Заңгерлік кеңсе Азаматтық істері Қылмыстық істері Әкімшілік істері Арбитраж даулары Заңгерлік кеңес Заңгер Адвокаттық кеңсе Қазақстан Қорғаушы  Заң компаниясы