Жаза тағайындағанда, жауаптылық пен жазаны жеңілдететін және ауырлататын мән-жайлар
Алматы қаласы Алмалы аудандық сотының 2017 жылғы 26 шілдедегі үкімімен А. бұрын сотталмаған, Қазақстан Республикасы Қылмыстық кодексінің (бұдан әрі – ҚК-нің) 191-бабы 2-бөлігінің 1), 2), 3) тармақтарымен мүлкі тәркіленіп, 3 жыл 6 айға бас бостандығынан айыруға сотталған. Жазасын қылмыстық-атқару жүйесінің орташа қауіпсіз мекемесінде өтеу тағайындалған. Сотталған А.-дан жәбірленушілер М.-ның пайдасына 1 180 000 теңге, Е.-нің пайдасына 60 000 теңге, мемлекет пайдасына 12 400 теңге мемлекеттік баж салығы өндірілген. Сот үкімімен А. адамдар тобымен алдын ала сөз байласып, жәбірленушінің өмірі мен денсаулығына қауіпті емес күш қолданып, бірнеше рет бөтеннің мүлкін ашық жымқырғаны үшін кінәлі деп танылған. Алматы қалалық сотының қылмыстық істер жөніндегі сот алқасының 2017 жылғы 5 қыркүйектегі қаулысымен үкімнің азаматтық талапқа қатысты бөлігі өзгертілген: сотталған А.-дан жәбірленуші М.-ның пайдасына 1 180 000 теңге, жәбірленушінің пайдасына 60 000 теңге және мемлекет пайдасына 12 400 теңге келтірілген зиянның өндірілуіне байланысты бөлігі қысқартылған. Үкімнің қалған бөлігі өзгеріссіз қалдырылған.
Жаза тағайындағанда, жауаптылық пен жазаны жеңілдететін және ауырлататын мән-жайлар
Сотталған А.-ның кінәсі іс бойынша жинақталған және сот отырысында жан-жақты, толық, объективті бағаланып, зерттелген дәлелдемелермен бекітілген және өтінішхатта дауланбаған. ҚК-нің 52-бабының және Қазақстан Республикасы Жоғарғы Сотының 2015 жылғы 25 маусымдағы № 4 «Қылмыстық жаза тағайындаудың кейбір мәселелері туралы» нормативтік қаулысының нормаларына сәйкес, соттар жаза тағайындау кезiнде қылмыстық құқық бұзушылықтың сипаты мен қоғамға қауiптiлiк дәрежесiн, кінәлі адамның жеке басын, оның ішінде құқық бұзушылық жасағанға дейiнгi және одан кейiнгi оның мiнез-құлқын, жауаптылық пен жазаны жеңiлдететiн және ауырлататын мән-жайларын, сондай-ақ тағайындалған жазаның сотталған адамның түзелуiне және оның отбасының немесе оның асырауындағы адамдардың тiршiлiк жағдайына ықпалын ескеруі қажет. Сотталған А.-ны сипаттайтын деректерге қарағанда ол қылмыстық жауапкершілікке бірінші рет тартылған, жас және қылмысын мойындап, жасаған әрекетіне шын жүректен өкінеді, сондай-ақ қазіргі таңда қылмыстық құқық бұзушылықпен келтірілген залал толығымен өтелген. Қылмыстық іс материалдарында жәбірленушілер М. мен Е.-нің сотталған А.-ның қылмыстық әрекетімен келтірілген шығын толығымен өндірілгені және сотталғанға қатысты ешқандай азаматтық талап жоқтығы туралы өтініштері тіркелген. Сонымен бірге жәбірленушілер сотталған А.-ға бас бостандығын айырумен байланысты емес жаза тағайындауды сұраған. Бұған қоса, іс бойынша сотталған А.-ның қылмыстық жауаптылығы мен жазасын ауырлататын мән-жайлар анықталмаған. Жеңілдететін мән-жайлардың жиынтығын ескере отырып, кассациялық сот алқасы сотталған А.-ға жазаны ҚК-нің 63-бабын қолдану арқылы тағайындау қажет деген қорытындыға келді. ҚК-нің 63-бабының 4-бөлігіне сәйкес шартты түрде соттау кезiнде мүлікті тәркiлеу тағайындалмайды. Осыған байланысты, сотталғанға тағайындалған мүлікті тәркілеу түріндегі қосымша жаза үкімнен алып тастауға жатады. Сот үкіміне сәйкес А. 2016 жылғы 26 шілдеде қамауға алынған. Ол 2018 жылғы 27 ақпанға дейін сот үкімімен тағайындалған 3 жыл 6 ай бас бостандығынан айыру жазасының 7 ай 1 күнін өтеген. Бүгінгі күні жазаның өтелмеген бөлігі 2 жыл 10 ай 29 күнді құрайды, яғни сотталғанға осы мерзімге пробациялық бақылау белгіленуге тиіс. Қазақстан Республикасы Жоғарғы Сотының қылмыстық істер жөніндегі сот алқасы сотталған А.-ға қатысты жергілікті соттардың сот актілерін өзгертіп, сотталған А.-ға ҚК-нің 63-бабын қолданып, ҚК-нің 191-бабы 2-бөлігінің 1), 2), 3) тармақтарымен тағайындалған жаза шартты деп есептеп, бас бостандығынан айыру жазасының өтелмеген бөлігі 2 жыл 10 ай 29 күнге пробациялық бақылау белгіледі. Сот үкімімен тағайындалған қосымша жаза - мүлікті тәркілеу алынып тасталды.
Назар аударыңыз!
«Заң және Құқық» адвокаттық кеңсесі, бұл құжаттың жалпылама екендігіне және нақты сіздің жағдайыңыздың талаптарына сәйкес келмеуі мүмкіндігіне көңіл бөлуіңізді сұрайды. Біздің заңгерлер сіздің нақты жағдайыңызға сәйкес келетін кез келген құқықтық құжатты әзірлеп көмектесуге дайын.
Қосымша ақпарат алу үшін Заңгер/Адвокат телефонына хабарласуыңызға болады: +7 (708) 971-78-58; +7 (700) 978 5755, +7 (700) 978 5085.
Адвокат Алматы Заңгер Қорғаушы Заң қызметі Құқық қорғау Құқықтық қөмек Заңгерлік кеңсе Азаматтық істері Қылмыстық істері Әкімшілік істері Арбитраж даулары Заңгерлік кеңес Заңгер Адвокаттық кеңсе Қазақстан Қорғаушы Заң компаниясы
