Тәуелсіз Мемлекеттер Достастығына қатысушы мемлекеттердің азаматтарының азаматтықты жеңілдетілген тәртіппен алу туралы конвенциясы
Тәуелсіз Мемлекеттер Достастығы Мемлекеттері басшылары кеңесінің 1996 жылғы 19 қаңтардағы Конвенциясы
Оған қол қойған мемлекеттер ратификациялауға тиіс.
Үшінші ратификациялық грамотаны депозитарийге сақтауға тапсырған күннен бастап есептегенде отызыншы күні күшіне енеді. Конвенция күшіне енгеннен кейін ратификациялық грамотасы депозитарийге сақтауға тапсырылған мемлекет үшін ол ратификациялық грамотасын сақтауға тапсырған күннен бастап есептегенде отызыншы күні күшіне енеді.
Қол қойғандар: Қазақстан Республикасы, Ресей Федерациясы, Тәжікстан Республикасы.
Хабарламалар тапсырғандар:
Ресей Федерациясы – 2003 жылғы 6 маусымда депонирленген (Конвенцияға қатысушы болмау ниеті туралы);
Қазақстан Республикасы – 2005 жылғы 28 наурызда депонирленген (мемлекетішілік рәсімдер орындалуда).
Ратификациялық грамоталарды тапсырғандар:
Тәжікстан Республикасы – 2001 жылғы 27 ақпанда депонирленген.
Конвенция күшіне енген жоқ.
Тәуелсіз Мемлекеттер Достастығына қатысушы мемлекеттер, бұдан әрі Уағдаласушы Тараптар деп аталады,
өз халықтарының тарихи дәстүрлі достық байланыстар мен тату көршілік қатынастарды сақтауға және нығайтуға деген ұмтылысын негізге ала отырып,
азаматтық бейбітшілік пен ұлтаралық келісімді қолдау мақсатында өзара ынтымақтастықты дамыта отырып,
жалпыға бірдей танылған халықаралық нормаларға сәйкес адамның құқықтары мен бостандықтарын қамтамасыз ету жөніндегі міндеттемелерге бейілділігін растай отырып,
өз азаматтарының еркін ерік білдіру негізінде Уағдаласушы Тараптардың кез келгенінің азаматтығын таңдау және алу құқығын іске асыруы үшін қолайлы жағдайларды қамтамасыз етуді қалай отырып,
Тәуелсіз Мемлекеттер Достастығының Жарғысын басшылыққа ала отырып,
Достастықтағы ынтымақтастық тетіктерін жетілдіруге және олардың тиімділігін арттыруға ұмтыла отырып,
ТӨМЕНДЕГІЛЕР ТУРАЛЫ КЕЛІСТІ:
1-бап
Әрбір Уағдаласушы Тарап өзінің азаматтарына Уағдаласушы Тараптардың кез келгенінің аумағына тұрақты тұруға кететін кезде азаматтықтан шығудың жеңілдетілген (тіркеу) тәртібін ұсынады, сондай-ақ оның аумағына Уағдаласушы Тараптардың кез келгенінің тұрақты тұруға келген азаматтарына мынадай шарттардың бірі болған жағдайда оның азаматтығын жеңілдетілген (тіркеу) тәртібімен алу құқығын береді:
а) егер өтініш беруші бұрын Уағдаласушы Тараптардың бірінің азаматтығында және бір мезгілде КСРО азаматтығында болса, 1991 жылғы 21 желтоқсанда олардың аумақтарында тұрған және осы Конвенция күшіне енгенге дейін тұрақты тұрып жатса;
б) егер өтініш берушінің жақын туысы – жұбайы (зайыбы), ата-анасының бірі (асырап алушысы), баласы (оның ішінде асырап алынған бала), әпкесі, сіңлісі, ағасы, інісі, атасы немесе әжесі, немересі – өзі алуға өтініш білдірген азаматтығы бар Уағдаласушы Тараптың аумағында тұрақты тұратын және оның азаматы болып табылатын болса.
Осы баптың 1-тармағында көрсетілген тәртіп Уағдаласушы Тараптардың әрқайсысының аумағында тұрақты тұратын Уағдаласушы Тараптардың әрбір азаматына, азаматтығы алынатын Уағдаласушы Тараптың аумағында тұру мерзіміне қарамастан қолданылады.
Осы Конвенцияға сәйкес азаматтықты алу және азаматтықтан шығу Уағдаласушы Тараптар азаматтарының еркін ерік білдіруі негізінде жүзеге асырылады.
2-бап
Осы Конвенцияға сәйкес азаматтықты алу және азаматтықтан шығу үшін жеңілдетілген (тіркеу) тәртібімен Уағдаласушы Тараптардың кез келгенінің азаматы азаматтығы алынатын Уағдаласушы Тараптың тиісті органдарына мынадай құжаттарды ұсынады:
азаматтықты алу және азаматтықтан шығу туралы өтініш,
азаматтың туу туралы куәлігінің немесе оның жеке басын және туған жерін куәландыратын басқа құжаттың көшірмесі,
1-баптың 1-тармағында көзделген шарттардың бірінің бар екенін растайтын құжат.
Уағдаласушы Тараптардың уәкілетті органдары Уағдаласушы Тараптардың ішкі заңнамасында көзделген талаптарды сақтай отырып, азаматтықты алу мен азаматтықтан шығуды жеңілдетілген тәртіппен тіркеуді 3 айдан аспайтын мерзімде жүзеге асырады.
Уағдаласушы Тараптардың кез келгенінің азаматтығын алу туралы өтінішхат берген адам оның өтінішхаты бойынша оң шешім қабылданғанға дейін бұрынғы азаматтығын сақтайды.
Азаматтық берген Уағдаласушы Тараптың уәкілетті органдары азаматтық алған адамдардың ұлттық паспорттарын азаматтықты алу және азаматтықтан шығу туралы өтініштің көшірмесін қоса бере отырып, азаматтықтан шығуды кейіннен тіркеу үшін бұрынғы азаматтығы бар Уағдаласушы Тараптың дипломатиялық немесе консулдық мекемесіне жібереді.
3-бап
Ата-анасының азаматтығы өзгеріп, соның салдарынан екеуі де Уағдаласушы Тараптардың бірінің азаматы болған немесе Уағдаласушы Тараптардың бірінің азаматтығынан шыққан жағдайда, олардың кәмелетке толмаған балаларының азаматтығы да тиісінше өзгереді.
Ата-анасының бірі Уағдаласушы Тараптардың бірінің азаматы болып табылатын, ал екінші ата-анасы Уағдаласушы Тараптардың кез келген басқа бірінің азаматтығын алған кәмелетке толмаған балалардың азаматтығы ата-аналардың келісімімен айқындалады, бұл келісім 2-бапқа сәйкес берілетін өтініште көрсетілуге тиіс.
Ата-анасы бөлек тұратын балалар, егер ата-аналары арасында бұл мәселе бойынша өзге келісім болмаса, өздері тәрбиесінде болатын ата-анасының азаматтығын сақтайды.
Ата-анасының азаматтығы әртүрлі болған жағдайда, балалардың бұрын белгіленген азаматтығы олар кәмелетке толғаннан кейін Уағдаласушы Тараптардың заңнамасына сәйкес жеңілдетілген тәртіппен өзгертілуі мүмкін.
Ата-ана құқықтарынан айырылған ата-аналардың азаматтығы өзгерген кезде балалардың азаматтығы өзгертілмейді. Ата-ана құқықтарынан айырылған ата-аналардың балалардың азаматтығын өзгертуіне келісімі талап етілмейді.
4-бап
Уағдаласушы Тараптардың әрқайсысы өзінің ішкі заңнамасында көзделген жағдайларда азаматтықты алуға және азаматтықтан шығуға өтінішхат білдірген адамға азаматтықты алудың және азаматтықтан шығудың жеңілдетілген (тіркеу) тәртібін беруден бас тарту құқығын өзінде сақтайды.
5-бап
Уағдаласушы Тараптардың кез келгенінің құзыретті органының азаматтықты алудың және азаматтықтан шығудың жеңілдетілген (тіркеу) тәртібімен азаматтық алудан және азаматтықтан шығудан бас тарту туралы шешіміне бір ай мерзімде тиісті Уағдаласушы Тараптың сотына шағым жасалуы мүмкін.
6-бап
Осы Конвенцияда қамтылмаған мәселелер Уағдаласушы Тараптардың ішкі заңнамасына сәйкес шешіледі.
Егер Уағдаласушы Тараптардың ішкі заңнамасында адамдардың қандай да бір санаты үшін азаматтық алудың неғұрлым жеңілдікті шарттары белгіленсе, онда бұл жағдайда Уағдаласушы Тараптардың ішкі заңнамасы қолданылады.
Уағдаласушы Тараптар азаматтық туралы заңнамаларын жақындастыру жөнінде шаралар қабылдайды.
7-бап
Осы Конвенцияны түсіндіруге немесе қолдануға байланысты мәселелер Уағдаласушы Тараптар арасындағы консультациялар мен келіссөздер арқылы шешіледі.
8-бап
Осы Конвенция Уағдаласушы Тараптар қатысушылары болып табылатын басқа халықаралық шарттардың ережелерін қозғамайды.
9-бап
Осы Конвенция оған қол қойған мемлекеттердің ратификациялауына жатады. Ратификациялық грамоталар осы Конвенцияның депозитарийі функцияларын атқаратын Тәуелсіз Мемлекеттер Достастығының Атқарушы Хатшылығына сақтауға тапсырылады.
Осы Конвенция үшінші ратификациялық грамотаны депозитарийге сақтауға тапсырған күннен бастап есептегенде отызыншы күні күшіне енеді. Осы Конвенция күшіне енгеннен кейін ратификациялық грамотасы депозитарийге сақтауға тапсырылған мемлекет үшін ол ратификациялық грамотасын депозитарийге сақтауға тапсырған күннен бастап есептегенде отызыншы күні күшіне енеді.
10-бап
Осы Конвенция күшіне енген күннен бастап бес жыл бойы қолданылады. Осы мерзім өткеннен кейін Конвенция әр жолы жаңа бес жылдық мерзімге автоматты түрде ұзартылады.
Әрбір Уағдаласушы Тарап ағымдағы бес жылдық мерзім аяқталғанға дейін 12 ай бұрын депозитарийге бұл туралы жазбаша хабарлама жіберу арқылы осы Конвенциядан шыға алады.
11-бап
Осы Конвенция күшіне енгеннен кейін оған барлық Уағдаласушы Тараптардың келісімімен басқа мемлекеттер депозитарийге қосылу туралы құжаттарды тапсыру арқылы қосыла алады. Қосылу депозитарий қосылуға келісім туралы соңғы хабарламаны алған күннен бастап отыз күн өткен соң күшіне енді деп есептеледі.
12-бап
Депозитарий осы Конвенцияға қол қойған және оған қосылған барлық мемлекеттерді әрбір ратификациялық грамотаның немесе қосылу туралы құжаттың сақтауға тапсырылған күні, Конвенцияның күшіне енген күні, сондай-ақ басқа хабарламалардың алынғаны туралы дереу хабардар етеді.
1996 жылғы 19 қаңтарда Мәскеу қаласында орыс тілінде бір түпнұсқа данада жасалды. Түпнұсқа дана Тәуелсіз Мемлекеттер Достастығының Атқарушы Хатшылығында сақталады, ол осы Конвенцияға қол қойған әрбір мемлекетке оның куәландырылған көшірмесін жібереді.
Қазақстан Республикасы үшін __________________ қолы
Ресей Федерациясы (РКФСР) үшін __________________ қолы
Тәжікстан Республикасы үшін __________________ қолы
Конституция Заң Кодекс Нормативтік акт Бұйрық Шешім Қаулы Адвокат Алматы заңгері Заң қызметі Заңгерлік кеңес Азаматтық Қылмыстық Әкімшілік істер даулар Қорғау Төрелік істер Қазақстан заң компаниясы Адвокаттық кеңсе Сот істері Декларация Жарлық Бұйрық Қаулы Шешім Баяндама Қорытынды Өтініш Қорытынды Конвенция Шарт Меморандум Әдістеме Нормалар Нота Қағидалар Бағдарлама Жарғы Хартия Бап Түсініктеме Резолюция Регламент Хаттама Жоба Бағдарлама Қағидалар Жолдаулар